Dinamike e infektimeve në Shqipëri ka shënuar një tjetër 24-orësh aspak pozitiv, pasi, veç 23 rasteve të reja, një kuotë jo e ulët në raport me hapjen, janë shfaqur sërish raste jashtë Tirane, pas ditësh me zero, siç në Lushnjë e Mat, si dhe një rast në Durrës.
Por flagrant është shfaqja e një rasti në Sarandë, e kjo për shkak të papërgjegjshmërisë së një ukrainase, e cila, e diagnostikuar me COVID-19 e në kushte karantine në Tiranë, e thyen atë duke udhëtuar drejt jugut për të festuar ditëlindjen së bashku me bashkëjetuesin e saj shqiptar. Ky rast i është shënuar gjithsesi Tiranës dhe jo Sarandës.
Në deklaratën e përditshme për shtyp, Dr. Eugena Tomini nga Instituti i Shëndetit Publik dha detajet:
“Gjatë 24 orëve të fundit janë testuar 276 qytetarë si të dyshuar të prekur me Covid19 dhe janë konfirmuar 23 raste të konfirmuara pozitive, 12 prej të cilave në Tiranë. 8 janë kontakte të rasteve të mëparshme pozitive dhe 4 janë raste të reja në proces hetimi.
Nga hetimi i thelluar epidemiologjik në QSUT, ku jane testuar 57 personel shëndetësor dhe pacientë, dhe të gjithë kanë rezultuar negativë.
6 raste janë konfirmuar në Mat, kontakte të një paciente në QSUT dhe 4 raste në Lushnje, kontakte të rasteve pozitive të konfirmuar më herët në Tiranë dhe 1 rast i ri në Durrës.
Në spitalin infektiv aktualisht po trajtohen 23 pacientë, nga të cilët 5 janë në terapi intensive.
Në 24 orët e fundit janë të shëruar 28 qytetarë, duke e çuar në 851 numrin e të shëruarve që nga fillimi i epidemisë”. /tesheshi.com/
