Auto Dak
Auto Dak
Auto Dak

VIZITA/ Ç’synon Erdogan në Qipron Veriore?

Presidenti turk Rexhep Tajip Erdogan udhëton të hënën në Republikën e vetëshpallur Turke të Qipros Veriore (TRNC) për një vizitë zyrtare dy-ditore.

Ai tha se do të sillte “lajme të mira” në shtetin e ndarë mesdhetar.

Por vizita e Erdogan mund të përshkallëzojë tensionet me grekët qipriotë dhe Bashkimin Evropian, të cilat janë të larta për shkak të ambicieve të Turqisë në rajon dhe mbështetjes së Ankarasë për zgjidhjen e problemit të Qipros me dy shtete të ndara.

Të martën, Erdogan do të marrë pjesë në përkujtimin e 47-vjetorit të ndërhyrjes ushtarake të Turqisë në ishull, të cilin grekët qipriotë e konsiderojnë një pushtim dhe do t’i drejtohet Parlamentit të Qipros Veriore.

“Shpresoj që në mënyrën më të bukur të përcjellim mesazhet e vendosjes së paqes për ishullin dhe gjithë botën,” tha ai të premten.

Ishulli, i ndarë që nga viti 1974

“Ne kemi bërë një hap të mirë. Ne kemi përfunduar studimet paraprake,” shtoi Erdogan, por nuk specifikoi për çfarë bëhej fjalë.

Ishulli i Qipros është ndarë që nga viti 1974, kur Turqia ndërhyri ushtarakisht në përgjigje të një grushti shteti të mbështetur nga Greqia.

Ankaraja tha se ajo veproi në përputhje me një dokument nga 1960, kur u formua shteti i Qipros, i cili thotë se Greqia, Turqia dhe Britania e Madhe kanë të drejtë të ndërhyjnë në rastet e mosmarrëveshjeve.

Që kur TRNC u formua në 1983, Këshilli i Sigurimit i Kombeve të Bashkuara shpesh i është referuar pjesës veriore të ishullit si “pjesa e pushtuar e Qipros” dhe njihet si një shtet i pavarur vetëm nga Turqia.

Republika e Qipros, e cila kontrollon jugun e ishullit dhe ka një qeveri greke qipriote, u bë një anëtare e BE në 2004.

Nisma të shumta diplomatike për të zgjidhur mosmarrëveshjen dekada të gjatë kanë dështuar.

Ndërsa Turqia mbron një zgjidhje me dy shtete, grekët qipriotë dhe bashkësia ndërkombëtare në përgjithësi favorizojnë një zgjidhje me një shtet.

Mensun Akgun, një profesor i marrëdhënieve ndërkombëtare në Universitetin e Stambollit Kultur, thotë se Erdogan pritet të riafirmojë fuqimisht mbështetjen për zgjidhjen me dy shtete gjatë vizitës së tij.

“Turqia është riorientuar në një zgjidhje me dy shtete, pasi asnjë marrëveshje nuk mund të arrihet edhe pas një dekade negociatash,” tha ai.

BE, jo zgjidhje me dy shtete

“Por Turqia nuk ka ofruar ende një udhërrëfyes për të bindur komunitetin ndërkombëtar dhe grekët qipriotë që t’i drejtohen asaj zgjidhjeje,” shtoi ai, duke theksuar se ky mund të jetë hapi tjetër i palës turke.

Ndërkaq,  Presidentja e Komisionit Evropian Ursula von der Leyen tha të enjten se BE nuk do të “pranojë kurrë” një zgjidhje me dy shtete në Qipro.

 “Unë dua të ritheksoj se ne kurrë nuk do të pranojmë një zgjidhje me dy shtete. Ne jemi të vendosur në këtë dhe shumë të bashkuar. Kjo është ajo që Qipro mund të presë,” tha Von der Leyen gjatë një vizite në ishull. /tesheshi.com/

auto pjese dak

Related posts