Ish-kryeministri i Kosovës, njëherësh kreu i AAK-së, ka një version të tij se pse SHBA po e kërkon formimin e Asocacionit të Komunave Serbe, që sipas tij nuk e do, por që e përdor për shkak të Kurtit.
“Amerika nuk po e do Asociacionin, por e ka për Kosovën me ia mbulu budallakikat dhe humbjet që ia ka shkaktuar këtij në veri. Se ka për ngut Amerika Asociacionin, nuk po kërkon atë, por po kërkon qysh me kthyer një gjendje normale në vend, pasi ky tipi (Albin Kurti) nuk e dëgjoi”, tha njeriu që deri dje ishte dhe ai problem për bashkësinë ndërkombëtare me taksën ndaj mallrave serbe.
“Kurti është njeri i gabuar për Kosovën në këtë kohë, ai po i rrit pasojat për Kosovën. Amerika po e bënë zjarrfikësin, ata vetëm po mundohen të sanojë dëmet e Kurtit. I sanoi në veri disa herë, po i sanon me politikën e tij të gabuar duke thirrur takimin tash për Asociacionin dhe mundur të nxjerrë Kosovën me një far fytyre në këtë proces”, ishin fjalët e ashpra ta Haradinajt ndaj njeriut që qeveris Kosovën, si ai dikur, të cilët janë përplasur më parë për Demarkacionin me Malin e Zi. Haradinaj e miratoi e Kurti e kundërshtoi.
Kreu i AAK-së komentoi edhe propozimin europian për marrëveshjen përfundimtare mes Kosovës dhe Serbisë, duke arsyetuar se “Serbia e njeh Kosovën në planin ndërkombëtar, bashkëpunon me Kosovën si shtet i pavarur me të gjitha të drejtat e barabarta midis dy vendeve”.
“Kjo na hap perspektivën për partneritet për paqe dhe ecim përpara. A duhet më shumë, ku me marrë më shumë, por jo me këtë njeri që po e kthen Kosovën secilin hap më prapa”, tha Haradinaj për Kosova Press. /tesheshi.com/
