Kryebashkiaku i Tiranës, Erion Veliaj ndau 30 banesat e para sociale pas zhbllokimit të vendimmarrjes për shpërndarjen e tyre me konstituiimin e këshillit të ri bashkiak. Kryebashkiaku u dorëzoi familjeve çelësat dhe dokumentacionin e përkatës, duke i bërë pronarë të një shtëpie.
Mes familjarëve që kanë përfituar banesa janë pjesëtarë të komunitetit rom që u nxorën me forcë nga shtëpitë dy vjet më parë, por edhe këngëtari i muzikës së lehtë shqiptare, Tonin Tërshana.
Ndërkaq, kreu i Bashkisë apeloi ndërtuesit të japin ndihmesë në zgjidhjen e problemeve të strehimit me anë të uljes së çmimeve të apartamenteve stok. Në të kundërt, sipas Veliajt, Bashkia do të përdorë mekanizmat ligjorë për t’i detyruar ata që të ulin çmimet sipas kërkesave të tregut.
“Ka disa gjera që shteti mund t’i bëj që t’i detyrojë privatët t’i binden rregullave të tregut. Për këtë arsye ne do propozojmë në Këshillin Bashkiak që të paguhet taksa e pronës edhe për apartamentet e pashitura. Nëse nuk vendosin të ulin çmimet, atëherë të përgatiten të paguajnë taksën e pronës. Është e vetmja mënyrë se si ne mund t’i kërkojmë ndërtuesve të ulin çmimet”, tha Veliaj. /tesheshi.com/
