“Tërmeti tundi malet por jo shqiptarin”, u tha nën komunizëm, edhe si sfidë ndaj Perëndimit, por kohërat kanë ndryshuar dhe ky i fundit është treguar zemërgjerë me shqiptarët, të cilët dy javë më parë u tundën dhe u shkundën mirë nga tërmeti, deri sa braktisën dhe masivisht shtëpitë pas një fake neës-si që endej midis naivitetit dhe djallëzisë.
Ambasadori Soreca, i pranishëm në ceremoni, tha ky është solidariteti në BE.
“Ne jemi krenarë për efikasitetin e mekanizmit tonë të BE për Mbrojtjen Civile. U deshën vetëm disa ditë pas aktivizimit të saj për të ngritur një ekip prej 8 ekspertësh dhe për ta dërguar atë në Shqipëri. Solidariteti është në zemër të Bashkimit Evropian. Qendra e Koordinimit për Reagimin e Emergjencave i përgjigjet kërkesës së qytetarëve tanë për një solidaritet të tillë përmes veprimeve konkrete, me efikasitet maksimal dhe burokraci minimale. Dhe jo vetëm brenda BE-së, pasi solidariteti nuk njeh kufi”, tha përfaqësuesi i Brukselit në Tiranë.
Pas tij, ishte ministrja Xhaçka që njoftoi një tjetër hap të qeverisë në funksion të sigurisë ndaj pasojave prej dëmeve natyrore.
“Anëtarësimi në Qendrën Evropiane për Koordinimin e Përgjigjes ndaj Emergjencave do të jetë vula e suksesit të kësaj pune që ne e kemi marrë shumë seriozisht, jo sepse është thjesht reforma e radhës, por sepse ka një ndikim të drejtpërdrejtë tek siguria, tek jeta dhe shëndeti i qytetarëve shqiptarë”, tha Xhaçka. /tesheshi.com/
