Ndërsa në Lindjen e Mesme po zhvillohen luftime midis Iranit dhe Izraelit, pas sulmit të Shteteve të Bashkuara ndaj objekteve bërthamore, shumë janë të shqetësuar për zhvillimin e mëtejshëm të situatës në Ngushticën e Hormuzit.
Qendrat kërkimore në të gjithë botën i frikësohen lëvizjes së Iranit për të mbyllur këtë ngushticë me peshë në ekononinë globale, dhe monitorimi i ngjarjeve në këtë pjesë të rëndësishme të botës zbulon lajme të reja.
Siç shkruan agjencia Fars nga Irani: “Pas sulmit amerikan ndaj tre objekteve bërthamore iraniane këtë mëngjes, situata në Ngushticën e Hormuzit është ‘tronditëse’, aq sa në kohën e njoftimit për shtyp, 17 cisterna nafte po largoheshin nga Gjiri, dhe vetëm tre cisterna kishin hyrë në Gjirin Persik”.
Një gjë interesante që mund të konkludohet nga gjurmimi i anijeve bazuar në faqen e internetit të Trafikut Detar është lëvizja në grup e anijeve, e cila është pasojë e rrezikut që paraqet trafiku përmes ngushticës, pas sulmit nga Shtetet e Bashkuara të Amerikës. Ndër të tjera, ka pretendime të paverifikuara se sinjali GPS i anijeve aktuale në ngushticë po interceptohet.
Anijet aktualisht po kalojnë nëpër ngushticë pa pengesa, por në numër më të vogël se zakonisht.
Analizat tregojnë se nëse ngushtica do të mbyllej, çmimi i naftës mund të arrinte në 200 dollarë ose edhe më shumë (parashikohet deri në 400 dollarë), dhe kjo tendencë rritëse do të krijonte probleme serioze jo vetëm për Shtetet e Bashkuara, por edhe për vendet në Evropë dhe Azi që varen nga nafta nga Gjiri Persik. Një e treta e anijeve të naftës kalojnë nëpër ngushticë çdo ditë.
Sipas Financial Times, amerikanët janë të shqetësuar se rritja e çmimeve të naftës jo vetëm që do të ndikojë në çmimin e benzinës në Shtetet e Bashkuara, por gjithashtu mund të shkaktojë rënie të vlerës së aksioneve në tregun e aksioneve me 5 deri në 8 përqind.
Inflacioni i përgjithshëm është një pasojë e drejtpërdrejtë e kësaj krize. Rritja e kostove të transportit rrit natyrshëm çmimet e mallrave dhe shërbimeve, dhe sipas analizës nga Rezerva Federale e SHBA-së, çmimet e ushqimeve do të rriteshin ndjeshëm. /tesheshi.com/
