Dasma e Jeff Bezos me Lauren Sanchez ka shkaktuar një stuhi reagimesh në Venecia, disa javë para se të zhvillohet. Ceremonia jashtëzakonisht e shtrenjtë, e planifikuar për ditët e fundit të qershorit, është bërë tashmë shkaku i protestave të forta sociale dhe politike nga banorët dhe grupet që denoncojnë “privatizimin” e qytetit dhe nënshtrimin e plotë ndaj orekseve të elitës financiare globale.
Jeff Bezos, themeluesi i Amazon dhe një nga njerëzit më të pasur në planet, thuhet se ka rezervuar të gjithë ishullin e San Giorgio Maggiore për ditën e dasmës së tij. Në të njëjtën kohë, ai ka prenotuar pesë hotele luksoze, të gjitha taksitë ujore dhe dhjetëra shërbime në qytet, i cili tashmë po mbytet nga mbingarkesa turistike.
Reagimet kanë shpërthyer nga grupime të tilla si “Laboratorio Occupato Morion”, i cili e përcakton veten si një hapësirë politike antifashiste, antikapitaliste dhe antiraciste. Grupi pati një protestë të premten, duke varur një poster me sloganin: “Nuk ka vend për Bezos, nuk ka vend për oligarkët!” dhe fytyrën e Bezos në një raketë.
Përfaqësuesja e grupimit, Alice Baccioli, i tha Daily Mail se mobilizimi i së premtes është vetëm fillimi. “Ne po përgatisim veprime të vogla gjatë gjithë javës dhe një demonstratë të madhe në ditën e dasmës. Qyteti do të vendoset nën bllokadë policore, do të privohet nga shërbimet dhe do t’i dorëzohet njeriut më të pasur në botë. Ne nuk mund ta pranojmë praninë e një personi të tillë në një qytet me një histori antifashiste”, tha ajo.
Një ngjarje luksoze me një gjurmë të rëndë mjedisore
Lista e të ftuarve përfshin emra të lartë nga showbiz-i dhe politika. Kardashianët, Ivanka Trump dhe bashkëshorti i saj Jared Kushner, Katy Perry dhe Eva Longoria janë vetëm disa nga ata që priten. Kostoja e ceremonisë vlerësohet të kalojë 10 milionë dollarë, dhe priten dhjetëra avionë privatë – vetëm Bezos zotëron katër Gulfstreams. Superjahti i tij prej 500 milionë dollarësh nuk mund të arrijë as në Venecia, pasi është shumë i madh për zonën.
Ky fakt po shkakton pakënaqësi të mëtejshme, pasi banorët ankohen se qyteti tashmë po mbytet nga ndotja, infrastruktura në shkatërrim dhe shfrytëzimi i pakontrolluar turistik. “Venecia po shndërrohet në një shesh lojërash për miliarderë. Ne jetojmë në përjashtim, pasiguri dhe margjinalizim”, thotë apeli i Morion.
Kryetari i bashkisë nën dyshimin për korrupsion
Kryetari i bashkisë së Venecias Luigi Brugnaro është tashmë në qendër të vëmendjes. Ai e ka konfirmuar dasmën, duke thënë se “ne do t’i mbështesim organizatorët në mënyrë që të respektohet veçantia dhe brishtësia e qytetit”. Megjithatë, kritikët e tij e akuzojnë atë për bashkëpunim dhe korruptim. Brugnaro është nën hetim për korrupsion, me akuzën se ka pranuar ryshfete multimilionëshe nga investitorët. Një zyrtar i lartë i qytetit është dënuar tashmë dhe është dërguar në burg.
“Brungnaro u shiti pjesë të qytetit investitorëve për përfitimin e tij – ai bëri të njëjtën gjë me Bezos-in”, tha Baccioli. /tesheshi.com/
