Ish-zëdhënësi i Departamentit të Shtetit të SHBA-së, Matthew Miller, ka pranuar se ka gënjyer për konferencat për shtyp që ka mbajtur në cilësinë e tij zyrtare gjatë administratës Biden, duke mbuluar krimet e kryera nga Izraeli kundër popullit palestinez në Gaza.
Miller këmbënguli se nuk mund të kishte shprehur një mendim të tillë ndërsa ishte zëdhënës i Departamentit të Shtetit të SHBA-së.
“Kur je në podium, nuk po shpreh mendimin tënd personal, por më tepër përfundimet e qeverisë së Shteteve të Bashkuara”, tha ai.
Hamasi i quan deklaratat e fundit të Matthew Miller, ish-zëdhënësit të Departamentit të Shtetit të SHBA-së gjatë administratës Biden, i cili pranoi se Izraeli kreu krime lufte në Gaza, një “pranim të rëndësishëm”.
“Ky pranim dënon pushtimin, konfirmon krimet e tij dhe ekspozon përpjekjet e administratës amerikane për të mbuluar të vërtetën rreth kësaj lufte brutale kundër civilëve të pafajshëm në Rripin e Gazës.”
E jo vetëm kaq: Miller i tha së fundmi Sky News të Britanisë se “është pa dyshim e vërtetë që Izraeli ka kryer krime lufte” në Gaza.
Deklarata e Miller se ai “nuk duhej ta kishte thënë të vërtetën” ndërsa ishte në detyrë “zbulon bashkëpunimin e thellë politik të administratës amerikane me agresorin izraelit dhe mbulimin e krimeve brutale nga ana e saj”.
“Ky pranim jo vetëm që dënon pushtimin, por gjithashtu e mban përgjegjës drejtpërdrejt Uashingtonin, si një partner të vërtetë në krimet e luftës dhe gjenocidin e kryer kundër popullit tonë palestinez në Rripin e Gazës, përmes financimit, armatimit, ofrimit të mbrojtjes politike dhe diplomatike dhe mbulimit mashtrues mediatik”, thekson Hamasi. /tesheshi.com/
