Forcat amerikane bombarduan tre objekte bërthamore iraniane herët këtë mëngjes, dhe Presidenti i SHBA-së Donald Trump theksoi se operacioni ishte jashtëzakonisht i suksesshëm dhe se objektet u “shkatërruan plotësisht”.
Kjo zgjidhi dilemën nëse SHBA-të do të vinin drejtpërdrejt në ndihmë të Izraelit në shkatërrimin e programit bërthamor të Iranit.
Për izraelitët, të cilët sulmuan disa vende bërthamore në Iran, sfida më e madhe ishte objekti Fordoë i varrosur thellë në male, të cilin ata nuk kanë armët e duhura për ta shkatërruar.
SHBA-të e bënë këtë për ta, duke sulmuar Fordoë-n dhe duke deklaruar se objekti ishte “shkatërruar”. Megjithatë, iranianët pretendojnë se sulmi ishte vetëm sipërfaqësor.
Irani njoftoi gjithashtu se rezervon të drejtën për të përdorur të gjitha mjetet për të mbrojtur sovranitetin, interesat dhe popullin e tij, në përputhje me Kartën e Kombeve të Bashkuara dhe dispozitat që lejojnë një përgjigje legjitime në vetëmbrojtje, siç tha ministri i Jashtëm iranian Abbas Araghchi.
Ai theksoi se sulmet e SHBA-së ishin “të shëmtuara” dhe do të kishin “pasoja afatgjata”.
Trump u përgjigj shpejt, duke paralajmëruar Iranin të mos hakmerrej kundër SHBA-së.
“Çdo hakmarrje nga Irani kundër Shteteve të Bashkuara të Amerikës do të përballet me një forcë shumë më të madhe se ajo që pamë sonte”, shkroi Trump në një postim në rrjetin social Truth Social, raporton BBC.
“Gama e opsioneve” të Iranit
Stephen Zunes, drejtor i studimeve të Lindjes së Mesme në Universitetin e San Franciskos, tha se Irani kishte një sërë opsionesh se si të hakmerrej kundër SHBA-së.
“Ata mund të sulmonin drejtpërdrejt forcat amerikane. Ka deri në 40,000 amerikanë brenda rrezes jo vetëm të raketave iraniane, por edhe të dronëve dhe armëve të tjera”, tha Zunes.
“Ekziston një flotë në Gjirin Persik, menjëherë pranë bregdetit iranian. Dhe ata mund të jenë të prekshëm nëse sulmohen… Kjo mund të ndikojë në transportin global, çmimet e naftës dhe në të vërtetë në të gjithë ekonominë globale“, shtoi ai.
Zunes përmendi opsione të tjera.
“Janë gjithashtu dhe milicitë përfaqësuese në Irak që mund të synojnë bazat amerikane atje.
Pra, ka një numër mënyrash se si forcat amerikane mund të jenë të cenueshme dhe do të habitesha nëse iranianët nuk do të synonin të paktën disa prej tyre”, arsyetoi ai.
Dhe pavarësisht sulmeve ajrore të SHBA-së në objektet kryesore bërthamore iraniane, Teherani mbetet i vendosur – programi bërthamor nuk është shkatërruar dhe përgjigja ende nuk ka ardhur.
Këshilltarët e lartë të Udhëheqësit Suprem Ajatollah Ali Khamenei po e bëjnë të qartë se Irani nuk do të tërhiqet nën presion.
Ali Shamhani, një këshilltar i shquar dhe ish-sekretar i Këshillit Suprem të Sigurisë Kombëtare të Iranit, njoftoi në rrjetin social X se Irani ende zotëron rezerva uraniumi të pasuruar dhe njohuri teknike, pavarësisht sulmeve të SHBA-së në objektet bërthamore.
“Edhe nëse objektet tona bërthamore shkatërrohen, loja nuk ka mbaruar. Materialet e pasuruara, njohuritë vendase dhe vullneti politik do të mbeten me ne,” shkroi Shamhani.
Ai gjithashtu theksoi se zhvillimi i mëtejshëm i situatës varet nga cila palë luan me zgjuarsi dhe nuk përdor sulme të pamatura. Ai paralajmëroi: “Surprizat do të vazhdojnë!”
Bazat amerikane, tani objektiva legjitime
Ali Akbar Velayati, këshilltari i Ajatollah Khameneit për çështjet ndërkombëtare, mori një ton edhe më të ashpër. Në një deklaratë për agjencinë shtetërore të lajmeve IRNA, Velayati tha se të gjitha bazat nga të cilat u nisën sulmet amerikane ndaj Iranit – pavarësisht se ku ndodheshin – tani do të ishin objektiva legjitime për forcat e armatosura iraniane.
“Çdo vend në rajon ose kudo tjetër që u ka mundësuar forcave amerikane të sulmojnë Iranin tani do të konsiderohet një objektiv legjitim“, tha ai.
Velayati paralajmëroi se prania ushtarake amerikane në Lindjen e Mesme po i vinte fundi.
“Nuk ka më vend për Amerikën dhe bazat e saj në këtë rajon ose në botën islame.”
Ai shtoi se sulmet e SHBA-së ishin një goditje në zemër të botës islame dhe se Irani nuk do të toleronte asnjë fyerje apo agresion. /tesheshi.com/
