Gjysmëfinalet e dyta të Europa League-s kanë patur për protagonistë Seviljen dhe Liverpulin, që kanë fituar bindshëm ndaj kundërshtarëve të tyre.
Sevilja e sheh veten për të tretin viti radhazi në finale të këtij aktiviteti, duke kërkuar ta fitojë atë po për herë të tretë rresht.
Liverpuli arrin suksesin e parë me Jurgen Klopp-in si trajner. Diçka e përsëritur. Kur Rafa Benitez e merrte ekipin në 2004-ën, po në atë sezon do ta bënte të fitonte Champions League-n, e të njëjtën gjë po bën gjermani, por këtë herë në kërkim të fitimit të Europa League-s.
Në “Estadio Ramon Sanchez Pizjuan”, Sevilja nuk e pati të vështirë t’i kalonte ukrainasit e Shakhtarit të
Donjeckut. Veç barazimit 2-2 në takimin e parë, spanjollët u ndihmuan nga një kundërshtar i fjetur dhe pa dëshirën e duhur për të fituar.
Gameiro, i përcaktuar dhe si futbollisti i ndeshjes, shënoi fillimisht në minutën e 9-të. Shakhtari do t’i gëzohej një barazimi të përkohshëm vetëm në fundin e pjesës së parë, kur realizon ish-sulmuesi i Arsenalit, Eduardo da Silva. I njëjti lojtar i Seviljes, Gameiro, e rikthen epërsinë për vendasit me të nisur 45 minutat e dyta. Mariano do të thellonte rezultatin më pas.
3-1 për Seviljen, që pret e qetë finalen.
Liverpuli ka patur një sezon me luhatje të jashtëzakonshme. Paraqitjet e mira janë zëvendësuar shpesh me paraqitje jopozitive, madje nganjëherë dhe skandaloze. Por ndeshja ndaj Vilarealit mbrëmjen e të enjtes ishte një prej atyre me të cilat Liverpuli mund të krenohet.
Ndaj një kundërshtari aspak të lehtë, me takimin e parë të humbur 1-0, Liverpulit i duhej shpejt të shënonte. Në një “Anfield” të tejmbushur e vazhdimisht mbështetës, lojtarët vendas bënë një prej paraqitjeve më të mira sezonale.
Firmino qe mbresëlënës me përdorimin e shkëlqyer të topit, siç spikati dhe Milner. Sturridge, në hije gjatë kësaj kohe, bëri gjithashtu një lojë të mirë, duke shënuar dhe një gol.
Liverpuli fitoi 3-0 falë një loje mjaft energjike, me sulme pa fund. Bruno shënoi autogol në minutën e shtatë. Ndërsa Sturridge e Lallana thelluan rezultatin në pjesën e dytë.
Beteja e ashpër në fushë, me përplasje të vazhdueshme, bëri që Vilareali të luajë me dhjetë lojtarë në 20 minutat e fundit, pas daljes me të kuqe të Victor Ruiz-it.
Liverpuli e Sevilja do të vihen karshi më 18 maj, në finalen që do të luhet në “St. Jakob-Park” të Bazelit. /tesheshi.com/
