Nga Blendi Gashi
Sipas gjitha gjasave, Progres-Raporti për Kosovën që Komisioni Evropian pritet ta bëjë publik brenda pak ditësh, do ketë ca “shuplaka” të mira për ecurinë e qeverisjes dhe institucioneve kosovare.
Raporti i Progresit është një dokument vlerësues për periudhën 12-mujore ndaj vendeve që aspirojnë anëtarësimin në Bashkimin Evropian.
Analistët politikë vlerësojnë se ashtu si në vitet e kaluara, edhe sivjet,Kosova do të marrë shumë kritika të ashpra dhe shumë pak vlerësime pozitive.
Fatmir Sheholli:
“Kosova do të ballafaqohet me “sëmundjen kronike” të kritikave për luftën jo të duhur kundër korrupsionit, sistemit jo të lakmueshem të drejtësisë, gjendjes jo stabile politike si dhe konceptualitetit jo të mjaftueshëm zhvëllimor të ekonomisë”.
Faik Krasniqi:
“Sa i përket çështjes së korrupsionit, Komisioni Evropian do e kritikojë edhe Këshillin Kundër Korrupsionit pasi ai vlerësohet si jo funksional. Do marrim kritika të forta, edhe për mosreformimin e Administratës Publike. Kështu që nga ky Raport i Progresit, Kosova kryesisht do të marrë vetëm kritika, dhe përjashtim ku do të bëjë ky Raport për vlerësim pozitiv, do të jetë nënshkrimi i marrëveshjeve me Serbinë dhe Malin e Zi, më 26 gusht në Bruksel”
Raporti i progresit për Kosovën në vitet e kaluara ka theksuar mungesën e sundimit të ligjit, luftimin e krimit të organizuar dhe korrupsionit, ngecjen në reformën e administratës dhe ngecje të reformës zgjedhore. /tesheshi.com/
