Kryeministri Edi Rama ka mbledhur tatimorët e rretheve dhe u ka lëshuar një ultimatum: Deri në fillim të vitit asnjë biznes në ccdo qoshe të vendit nuk duhet të jetë pa kasë fiskale.
Rama tha se “qeveria është e vendosur t’i shkojë deri në fund betejës së re për vendosjen e plotë të rendit ligjor në hapësirën e aktivitetit ekonomik dhe tregtar në vend”.
Kreu i qeverisë, ashtu si ministri i Zhvillimit Ekonomik një ditë më parë, në një takim me punonjësit e tatimeve dhe taksave, nënvizoi se aksioni i shtatorit ndaj bizneseve informale “nuk është betejë kundër biznesit, por një betejë për të mbrojtur konsumatorin nga ata që vjedhin paratë që i duhen shtetit për të ulur taksat”.
Rama deklaroi gjithashtu se “ky operacion duhet bërë me respekt ndaj bizneseve”. “Të denoncohet çdo sjellje e padenjë e punonjësve të doganave e tatimeve. Falenderim për çdo biznes të rregullt dhe masë për atë që ka shkelur ligjet. Fitorja e kësaj beteje është e barabartë me ulje taksash e rritje rrogash. Ulja e informalitetit është e barabartë me një hov të ri zhvillimi ekonomik e social”, tha Rama. /tesheshi.com/
