Shqipëria dhe Turqia kanë ridimensionuar relacionet, të cilat prej dy vitesh kanë një vijimësi me hope, megjithëse janë shpallur nga Tirana zyrtare si “strategjike”.
Edi Rama është pritur në rezidencën e Stambollit të Presidentit turk Rexhep Tajjip Erdogan dhe siç njofton zyra e shtypit e Kryeministrisë kanë folur për rritjen e projekteve turke në Shqipëri.
Pikërisht sipas këtyre informative, Erdogan ka premtuar nisjen e një sërë financimesh nga Ankaraje për Shqipërinë, kryesisht në sektorin bujqësor dhe në shëndetësi.
Edhe pse në qendër të bisedës ishte situata e sigurisë në rajon, si pjesë e sfidës së përbashkët kundër terrorizmit dhe kriza e refugjatëve sirianë, Erdogan në takim u angazhua për një mbështetje me programe konkrete investimesh, qoftë për ujin e pijshëm dhe qoftë për ujitjen e kullimin në zonat bujqësore.
Siç theksohet në njoftimin për shtyp, “u përcaktuan një sërë veprimesh konkrete për të fuqizuar infrastrukturën shëndetësore dhe arsimore përmes partneriteteve publik-privat”.
Edi Rama ka vizituar katër herë Turqinë që prej vitit 2013, tre herë Stambollin dhe vetëm një herë Ankaranë.
Ndërkaq, Shqipërinë e ka vizituar një herë Presidenti Erdogan, pak pasi u zgjodh në këtë post dhe dy herë zoti Ahmet Davutoglu, kur mbante postin e Ministrit të Jashtëm.
Në fillimet e negociatave Shqipëri-Turqi, u fol se turqit do të merrnin kompaninë shtetërore të shpërndarjes së energjisë OSHE pas largimit të CEZ-it.
Në fakt, një kompani turke,e Çalik ka marrë shpërndarjen e energjisë në Kosovë. Por prej dy vjetësh nuk po flitet më për këtë dhe nga Ministria e Energjisë dhe Industrisë janë larguar këshilltarët turq që erdhën në vitin 2013.
Nga samiti i Këshillit Atlantik për Energjinë dhe Ekonominë, i mbajtur në Stamboll, që shërben si një platformë për bashkërendimin e strategjive ekonomike, politike dhe energjitike, kryeministri Edi Rama foli për objektivat e qeverisë shqiptare në këtë sektor.
“Përpjekjet e vazhdueshme të qeverisë kanë prodhuar një transformim spektakolar në vetëm dy vjet. Tani niveli i arketimeve është në gati 100%, ndërsa niveli i humbjeve në sektorin e shpërndarjes ka rënë në mënyrë dramatike. Për herë të parë në 25 vitet e fundit, Kompania Shqiptare e Shpërndarjes së Energjisë ka regjistruar në 2015 fitime operative, duke bërë të mundur që të fillojnë të investojnë në sistem. Qëllimi ynë është të transformojmë sektorin e energjisë nga barra më e rëndë e buxhetit të shtetit shqiptar dhe pengesa më e rëndë për të përballuar të ardhmen, në një sektor që vetëfinancohet dhe kontribuon brenda vitit 2018”, deklaroi Rama.
/tesheshi.com/
