Të enjten, më 29 maj, Hamasi refuzoi propozimin e armëpushimit të paraqitur nga i dërguari i SHBA-së Steve Witkoff, duke kërkuar që ai të ndryshohet, siç thonë ata, për të “mbrojtur interesat e popullit palestinez” dhe për të mundësuar arritjen e një armëpushimi të përhershëm në Gaza.
Sipas burimeve të njohura me negociatat, Hamasi beson se është “luajtur” nga administrata amerikane, duke e akuzuar atë se favorizon ekskluzivisht Izraelin dhe nuk përmban garanci për një fund të vërtetë të luftës.
“Propozim i padrejtë”
Një burim pranë negociatave i tha The Jerusalem Post se propozimi i ri i SHBA-së kërkon që të gjithë pengjet të lirohen brenda shtatë ditëve, duke i humbur kështu Hamasit një mjet kyç negociues. Për më tepër, propozimi nuk përfshin garanci të qarta se armëpushimi i përkohshëm do të çonte në një armëpushim të përhershëm, as se armëpushimi do të ruhej nëse negociatat zgjasin më shumë se 60 ditë.
Siç raportohet nga media Walla, një burim pranë Hamasit pohon se propozimi i ri është edhe më i favorshëm për Izraelin krahasuar me versionet e mëparshme, duke pretenduar se Witkoff miratoi shumicën e kërkesave të ministrit Izraelit Ron Dermer të paraqitura në një takim të mbajtur më parë këtë javë.
Detajet e propozimit dhe përgjigja e Hamasit
Sipas propozimit, Hamasi do të lironte 10 pengje të gjallë dhe 18 të vdekur në dy faza. Parashikohet një armëpushim 60-ditor, i cili mund të zgjatet me marrëveshje të ndërsjelltë. Ushtria izraelite gjithashtu do të tërhiqej pjesërisht nga Gaza, dhe Kombet e Bashkuara do të merrnin përsipër logjistikën e shpërndarjes së ndihmës humanitare.
Hamasi tha në një deklaratë zyrtare se udhëheqësit e tij “kanë marrë propozimin e ri të Witkoff nga ndërmjetësi dhe po e shqyrtojnë atë me përgjegjësi në mënyrë që t’u sjellë lehtësim njerëzve dhe të mundësojnë një fund të qëndrueshëm të konfliktit”. /tesheshi.com/
