Presidenti i Republikës nuk ka firmosur strukturën e posaçme që do të hetojë zyrtarët e korruptuar.
Bëhet fjalë për task-forcën e krijuar në Prokurorinë e Krimeve të Rënda me firmën e Kryeprokurorit dhe që drejtohet nga Dritan Rreshka.
Struktura antikorrupsion është ngritur prej një viti e gjysmë dhe ka përgatitur rreth 400 dosje për të hetuar ndaj zyrtarëve të lartë dhe të mesëm të administratës.
Madje Kryeprokurori Adriatik Llalla tha se në vjeshtë do të ketë një valë arrestimesh për çështje korrupsioni.
Por ja që kreu i shtetit ka kundërshtuar emërimin e 4 prokurorëve të task-forcës antikorrupsion nga kreu i institucionit, Adriatik Lalla.
Ata janë: Armand Gurakuqi, Anisa Qilimi, Enkelejda Minollai, Gent Osmani dhe shefin që do t’i drejtojë ata, prokurorin Dritan Rreshka.
Osmani u transferua nga Prokuroria e Elbasanit te Krimet e Rënda, kurse katër të tjerët u votuan nga Këshilli i Prokurorisë, e më pas u emëruan nga Prokurori i Përgjithshëm.
Ky kundërshtim i Nishanit e kthen në nul të gjithë lëvizjen e Prokurorisë, pasi struktura del jashtë ligjit.
Argumenti i Presidentit të Republikës ka qenë mosndjekja e kritereve në emërimin e këtyre prokurorëve.
Lalla dhe Nishani që prej kohësh kanë marrëdhënie të ftohta edhe në publik janë parë prej shumë muajsh, jo si shokë kuptohet, por si drejtues të lartë të shtetit.
Për këtë flet fakti se pamjet e takimeve mes tyre janë bërë në kohën kur Nishani mbante mustaqe dhe nuk gjendet asnjë foto me lukun e ri të kreut të shtetit, pra pa mustaqe.
Ndërkaq, megjithë refuzimin e Presidentit, Kryeprokurori Llalla ka vendosur që t’i mbajë të komanduar bërthamën antikorrupsion.
Aktualisht në Prokurorinë e Krimeve të Rënda janë me pëlqim vetëm prokurori Gentian Osmani dhe prokurori amerikan, Gjon Junçaj. /tesheshi.com/
