Opozita siriane këmbëngul në largimin e Bashar Assad-it, duke e çmuar këtë si aspekt kyç të një marrëveshjeje politike në vendin e rrënuar nga konflikti gjashtëvjeçar.
Thirrja për largimin e kreut të regjimit sirian është përsëritur sërish dje, pas një takimi të kryenegociatorit të Komitetit të Lartë të Negociatave, Nasr al-Hariri, me zëvendësin e të dërguarit të posaçëm të OKB-së për Sirinë, Ramzi Izz Eddin Ramzi.
“Ne përsëritëm në fillim të takimit se aspekti kyç i procesit politik është largimi nga detyra i Assad-it dhe i atyre që kanë marrë pjesë në krimet kundër popullit sirian,” ka deklaruar kryenegociatori i opozitës siriane.
Një periudhë tranzicioni politik është prej kohësh në tavolinën e bisedimeve për arritjen e paqes në Siri. Palët në konflikt janë në kundërshti të hapur në lidhje me pozitën e Bashar Assad-it në këtë proces. Opozitarët nuk e duan atë, dhe kërkojnë largimin e tij; në të kundërt, përfaqësuesit e regjimit as e mendojnë periudhën tranzitore pa të.
Bisedimet e Gjenevës, të rifilluara javë më parë, nuk kanë patur ndonjë zhvillim shpresëdhënës. /tesheshi.com/
