Ambasadori i SHBA-së në Tiranë, ka marrë një rol gjithnjë e më aktiv duke mbajtur anën e opinionit publik dhe goditur e kritikuar njerëzit me pushtet.
Pas politikanëve, ai sot ka folur për policët, gjatë një takimi ku është prezantuar Kodi i Etikës së Policisë.
Duke vënë “gishtin në plagë”, diplomati i Uashingtonit tha se “drejtësia shqiptare ka pasur sfidat e saj me luftën kundër krimit dhe hartimi i këtij kodi do të ndihmojë në këtë betejë. Policët janë shembull për një brez të tërë fëmijësh. Ky është një kod shumë i fortë sjelljeje. Do të ishte i pakuptimtë nëse policët nuk e kuptojnë dhe nuk diskutojnë për të”.
Ndërsa ministri i Brendshëm Saimir Tahiri nënvizoi se “kërkohet më shumë vullnet nga punonjësit e policisë për ta bërë Kodin e Etikës një dokument të gjallë që i qëndron kohës”.
Drejtori i Policisë së Shtetit, Haki Çako, u shpreh nga ana e tij se “dokumenti i Kodit të Etikës ndihmon në sjelljen e kulturuar të efektivëve, kultivimin e frymës së bashkëpunimit, rritjen e imazhit pozitiv të policisë dhe në parandalimin e korrupsionit”. /tesheshi.com/
