Instituti i Shkencave të Studimeve Politike Po në Paris i ndalon studentët e tij të përdorin aplikacionin e inteligjencës artificiale ChatGPT, i cili mund të shkruajë tekste në përgjigje të pyetjeve të thjeshta.
Nëse kapen duke përdorur aplikacionin, dënimi për studentët mund të shkojë deri në “përjashtim nga ai institucion, apo edhe nga arsimi i lartë fare”.
Në një letër drejtuar studentëve dhe pedagogëve, drejtuesit e Institutit deklarojnë se përdorimi i ChatGPT dhe çdo mjeti tjetër që përdor inteligjencën artificiale është i ndaluar, përveç për qëllime pedagogjike, nën mbikëqyrjen e pedagogëve.
Ky ndalim vlen për shkrimin e punimeve të studentëve, si dhe për përgjigjet me gojë.
Sciences Po është institucioni i parë i arsimit të lartë në Francë që ndalon zyrtarisht këtë aplikim të inteligjencës artificiale.
ChatGPT është zgjeruar me shpejtësi në botën e arsimit që nga nëntori i kaluar.
Administrata e Institutit Sciences Po deklaroi se bota e arsimit dhe kërkimit duhet të vërë në dyshim përdorimin e një mjeti të tillë që mund të çojë në mashtrim dhe plagjiaturë.
Disa shtete tashmë e kanë ndaluar përdorimin e tij në shkolla dhe universitete, shtoi Instituti.
Disa universitete në Australi ndryshuan pyetjet e provimit në mes të dhjetorit, disa javë pas shfaqjes së mjetit nga kompania kaliforniane OpenAI, në mënyrë që studentët të mos mashtronin në provim duke përdorur aplikacionin. /tesheshi.com/
