Presidentja e Kosovës Vjosa Osmani u prit me nderime të larta shtetërore në kompleksin qeveritar “Perdana Putra” në Kuala Lampur të Malajzisë, aty ku pati një takim dhe një konferencë të përbashkët me kryeministrin Anwar Ibrahim.
Kryeministri Ibrahim tha se do të ketë konsultim dypalësh në nivel zyrtar sa më shpejt të jetë e mundur, për të siguruar që të ndikojnë sa më shpejt në marrëdhëniet tregtare dhe ekonomike ndërmjet Malajzisë dhe Kosovës.
Ndërsa Osmani tha se në takim riafirmuan angazhimin për lidhje më të forta diplomatike, dhe partneritete më të ngushta ekonomike në fushat me interes të përbashkët.
Ajo ka mirëpritur edhe vendimin e Malajzisë për heqjen e vizave për qytetarët e Kosovës, si një akt besimi dhe miqësie midis dy vendeve tona.
Gjithashtu, Osmani ka falënderuar kryeministrin Ibrahim për mbështetjen e vazhdueshme të Malajzisë për anëtarësimin e Kosovës në organizatat ndërkombëtare duke thënë se Kosova është e gatshme të kontribuojë edhe në platformat e mëtejshme rajonale si ASEAN.
Në këtë frymë, presidentja Osmani ka nderuar kryeministrin Ibrahim me Urdhrin e Pavarësisë, për kontributin e vazhdueshëm të Malajzisë për lirinë, pavarësinë dhe ndërtimin e shtetit të Kosovës.
Gjatë kësaj vizite, Presidentja Osmani ka përuruar hapjen e ambasadës së Kosovës në Kuala Lumpur.
“Një dritare e re për vendin tonë, me plot mundësi për bashkëpunim edhe më të thellë me Malajzinë. Një prani edhe më e fuqishme diplomatike në një nga rajonet më strategjike në Azi. Një shtëpi më shumë e Kosovës, ku do të avancohen interesat e qytetarëve tanë, do të fuqizohen aleancat tona dhe do të mbrohet me vendosmëri shenjtëria e sakrificës së popullit të Kosovës për liri e shtet”, ka theksuar presidentja e Kosovës.
