Liderët e partive opozitare, edhe një herë i kanë bërë të qartë pushtetit se nuk do të tërhiqen dhe se opozita do të mbetet e bashkuar e se do të triumfojë.
Kreu i VV-së Visar Ymeri ka thënë se qëllimit i tyre është ta ndalin Zajednicën dhe që shteti të ketë sovranitet.
“Tash ka edhe ndërkombëtarë që mendojnë se marrëveshjet mund të tërhiqen. Nuk mund të pranojmë betonizimin e Kosovës me Zajednicë dhe të falim tokë. Nëse lejojmë Zajednicën, atëherë Beogradi do të jetë përsëri kryeqytet i rajonit”, ka thënë Ymeri.
Ymeri ka shprehur edhe njëherë bindjen e tij se koalicioni Thaçi-Mustafa e ka një arsye, e ajo sipas tij është “Zajednica”.
“Tërheqja ka vetëm vonim por jo shpëtim. Nëse tërhiqet nënshkrimi i heqim bashkë me nënshkrim edhe qeverinë. Më 28 nëntor do të dalim për të festuar paqësisht. Opozita do të mbetet e bashkuar ashtu si është dhe do të fitojë. Së bashku të pathyeshëm”, ka deklaruar Ymeri.
Kryetari i AAK-së, Ramush Haradinaj, nisi me ironi fjalimin e tij para militantëve të partive opozitare.
“Albin a je këtu? Ndoshta Albini është, por nuk po e shohim, e Donika është në pushim pak. Jemi bashkuar për këtë që po ndodh dhe e dini pse jemi këtu? Kemi një mision të vështirë, në vendin që ka nisur të jetë i pavarur. Para lufte deshën të na e marrin autonominë dhe kemi filluar rezistencën. Edhe pasluftës deshën të na japin më pak se pavarësi, por ne kemi qëndruar stoikë dhe tash e kemi Republikën e pavarur me Ahtisaarin në mes”, ka thënë Haradinaj.
Ai shprehet se “ndërkombëtarët na ofruan që Serbinë ta fusim brenda”.
“Unë kam qenë ndër ata që u kanë thënë Jo! Në Kosovë nuk duhet të jenë dy zot shtëpie. Vetëm ne. Tash i kemi dy Kosova: atë të 17 shkurtit dhe atë të Zajdenicës. Por ne jemi në detyrë t’i ndalim dy Kosova, që ata dy po i krijojnë, duke përdorur edhe policinë, AKI-në, gjyqësorin e administratën kundër opozitës”, ka thënë ai.
Lideri i NISMA-s, Fatmir Limaj deklaroi gjatë takimit të sotëm të opozitës se bashkimi i tyre nuk është i drejtuar kundër askujt.
“Keni përgjegjësi të madhe për të mos rënë pre e parullave se kemi konflikt të brendshëm. Ne kemi vetëm konflikt kundër dhënies së Kosovës. Mos lejoni të ndajmë qytetarët në AAK, VV, NISMA. Askush nuk është pro ndarjes së vendit pa marrë parasysh. Ata i kanë sfiduar të gjithë mekanizmat e tyre për ta ndarë opozitën por s’ka asgjë që na ndan. Nuk jemi bashkuar për opsionin politik, por për interes nacional”, tha Limaj, duke shtuar se dallimet dhe ideologjitë politike janë të parëndësishme drejt kësaj kauze. Limaj u shpreh se nëse Isa Mustafa e Hashim Thaçi e kanë lidhur fatin e tyre politik do të shkojnë edhe ata bashkë me marrëveshjet./tesheshi.com/
