Barack Obama, e ka bërë tashmë një rit që në shtator kur zhvillohet sesioni i punimeve të Asamblesë të Përgjithshme të OKB-së, i mbledh të gjithë liderët e vendeve të ashtuquajtura të “botës së tretë” dhe del në foto zyrtare me ta.
Më e bukura është se fotot i shkrep vetëm një fotograf, ai zyrtari i Shtëpisë së Bardhë. Në foto përveç Presidentit të SHBA-së shfaqet edhe bashkëshortja e tij Michele, por edhe bashkëshortja apo bashkëshorti(sipas rastit) i kreut të shtetit apo qeverivsë që fotografohet.
Dhe pas një pritje me ankth prej gati një muaj, fotografia u shkon e stampuar me dedikim nga vetë Obama, normalisht përmes rrugëve diplomatike. Në Shqipëri, Kosovë, Maqedoni, por edhe vende të tjerë të Ballkanit, kjo foto tradicionale është bërë një garë për të treguar se kë do më shumë Obama.
Dhe kësaj gare nuk i ka shpëtuar as zyra e qeverisë së Kosovës, që bëri të ditur se këtë herë i ftuar për foton e famshme do të jetë vetë Kryeministri Isa Mustafa. Sipas zyrës së shtypit të qeverisë, Presidenti i SHBA-së Barack Obama, ka ftuar kryeministrin Isa Mustafa, që të marrë pjesë në samitin e liderëve, që do të mbahet më 29 shtator në Nju Jork.
Samiti do të mbahet në selinë e Kombeve të Bashkuara dhe në të do të diskutohet për të arritjet e shteteve në luftën kundër ISIS-it dhe ekstremizmit të dhunshëm. Ftesa për të marrë pjesë në këtë samit i është dorëzuar para pak ditësh kryeministrit Isa Mustafa nga Ambasada e SHBA-së në Prishtinë, thuhet në njoftimin për media.
Vitin e shkuar, në këtë takim ka qenë Presidentja e Kosovës, Atifete Jahjaga, e cila në fakt shkaktoi diskutime më pas, sepse nuk e kishte marrë bashkëshortin dhe në foto doli vetë me çiftin Obama.
/tesheshi.com/
