Jurgen Gjeloshaj është në vitin e fundit të studimeve në Oxford për inxhinieri elektromekanike dhe ka vendosur të kthehet në Shqipëri, pra të shkojë kundër rrymës.
Dhe këtë “zë në shkretëtirë”, kryeministri Rama e promovon si model mençurie në zgjedhjen e jetës, pra kthimin për të punuar në Shqipëri pas studimeve në Oxford.
“Gjatë studimeve të mia kam drejtuar ekipin e Robotikës në universitet, si dhe kam punuar në fushën e kërkim-zhvillimit me kompaninë BMË. Megjithatë sot unë shoh të ardhmen e karrierës sime në Shqipëri. Shqipëria ofron mundësi të jashtëzakonshme për të rinjtë që aspirojnë në fushën e inxhinierisë, teknologjisë dhe biznesit”, u shpreh ai.
Sipas tij, Shqipëria ka një sistemi favorizues taksash, treg të mirë pune, iniciativa të vazhdueshme për mbështetjen financiare të startup-eve për të rinjtë.
“Rritja e vazhdueshme e pagesës dhe kërkesës për profesionistë janë vetëm disa nga arsyet përse Shqipëria është investimi i duhur”, u shpreh ai.
Po ashtu, numri në rritje i kompanive ndërkombëtare që kanë hyrë në vendin tonë, duke mos harruar pa përmendur ruajtjen e lidhjes me familjen dhe të afërmit, të gjitha arsye se pse Jurgeni ka zgjedhur vendlindjen duke nisur një kapitull të ri për veten dhe kontributin që dëshiron të japë për Shqipërinë.
Gjeloshaj u bëri një thirrje të rinjve jashtë vendit të kthehen në vendlindje. “Largimi është dorëheqje dhe dorëheqja nuk duhet të jetë më opsion për të rinjtë. Së bashku mund të nisim një kapitull të ri për Shqipërinë, si vend i emancipuar, i mundësive dhe i të ardhmes. Unë sot zgjedh vendlindjen time, zgjedh Shqipërinë”, tha ai.
Megjithatë, në finale, ky i ri është thjesht “zë në shkretëtirë”.
Largimet nga Shqipëria, me në krye të rinjtë, jo vetëm që nuk njohin frenim, por me vrullin e tyre i kanë shndërruar një pjesë të mirë të qyteteve shqiptare në shkretina urbane. /tesheshi.com/
