Bashkësia ndërkombëtare duhet të shqyrtojë vendosjen e sanksioneve ndaj Izraelit për t’i dhënë fund luftës në Gaza, tha ministri i jashtëm spanjoll, përpara një samiti të vendeve evropiane dhe arabe në Madrid mbi këtë çështje.
“Në afat të shkurtër, për të ndaluar këtë luftë që nuk ka më qëllim dhe që ndihma humanitare të kthehet, masivisht, pa pengesa, në mënyrë neutrale, në mënyrë që Izraeli të mos vendosë se kush mund të hajë dhe kush jo (…) do të duhet të shqyrtojmë sanksionet”, tha José Manuel Álvarez për radion France Info. “Ne duhet të bëjmë gjithçka, të shqyrtojmë gjithçka për të ndaluar këtë luftë”, këmbënguli ai, pasi Bashkimi Evropian vendosi javën e kaluar të rishikojë marrëveshjen e bashkëpunimit me Izraelin.
Pas zgjerimit të fundit të operacioneve ushtarake në Gaza, shumë vende që Izraeli i konsideron aleate i janë bashkuar presionit ndërkombëtar në rritje për t’i dhënë fund luftës. Bllokada dy-mujore e enklavës ka përkeqësuar mungesat në ushqim, ujë, karburant dhe ilaçe, me organizatat ndërkombëtare që shprehin ankthin e urisë. Organizatat humanitare thonë se ndihma minimale që Izraeli ka lejuar të kalojë ditët e fundit nuk mund t’i përmbushë nevojat.
Madridi po pret një samit të 20 vendeve evropiane dhe arabe, si dhe organizatave ndërkombëtare, mbi këtë çështje. Takimi synon të ndalojë luftën “çnjerëzore” dhe “iracionale” të Izraelit në Gaza, u tha Alvarez gazetarëve para fillimit të bisedimeve, të cilat synojnë gjithashtu të çojnë përpara zgjidhjen me dy shtete.
Edhe ministri i Jashtëm francez Jean-Noel Barrot theksoi nevojën për të ushtruar “presion të koordinuar” që do të çojë në një armëpushim, hyrjen e ndihmës humanitare në Gaza dhe lirimin e pengjeve.
Në Spanjë janë të pranishëm përfaqësues të shumë vendeve, si Britania, Gjermania, Italia, Egjipti, Jordania, Arabia Saudite, Turqia, Maroku, si dhe përfaqësues të Lidhjes Arabe dhe Organizatës së Bashkëpunimit Islamik. Irlanda, Islanda, Norvegjia, Sllovenia dhe Brazili po marrin pjesë gjithashtu.
Spanja synon t’u kërkojë pjesëmarrësve të vendosin një embargo armësh ndaj Izraelit dhe “të mos përjashtojnë” asnjë sanksion kundër atyre që “duan ta shkatërrojnë përgjithmonë zgjidhjen me dy shtete”. /tesheshi.com/
