Dhoma e Deputetëve në Itali miratoi reformën e nënshtetësisë, e cila u deklarua një prioritet nga qeveria Renzi, edhe pse u kundërshtua ashpër nga disa forca të djathta, përfshirë edhe Forza Italia-n.
Pavarësisht mosmarrëveshjeve, reforma kaloi testin e parë në dhomën e Deputetëve, ndërsa më pas do të votohet edhe në senat ku beteja është më e vështirë. Me 310 vota pro, 66 kundër dhe 83 abstenime, janë miratuar rregullat për nënshtetësinë e re italiane.
Po çfarë parashikon ligji në fjalë, ndërsa emigrantët shqiptarë mund të jenë përfitues nga kjo reformë.
Kështu, qytetarë italianë nga lindja do të jenë të gjithë fëmijët që kanë lindur në territorin e republikës italiane, nga prindër të huaj në rast se njëri prej tyre ka leje qëndrimi në vendet e BE-së me afat të gjatë. Mjafton një deklaratë ku të shprehet vullneti i njërit prind që fëmija të marrë nënshtesinë italiane. Kërkesën mund ta bëjë edhe kujdestari ligjor i minorenit i caktuar nga komuna e vendbanimit që duhet të aplikohet përpara ditëlindjes së 18-të të fëmijës.
Në mungesë të kësaj deklarate, mund të jetë vetë minoreni që të kërkojë të marrë nënshtetësinë deri në ditëlindjen e 20-të të tij, kur ka mbushur edhe moshën për të qenë subjekt juridik.
Në raste të tjera, për të huajt që janë të lindur dhe banues në Itali në mënyrë të ligjshme, e që kanë jetuar në vend pa ndërprerje, mund të kërkojnë nënshtesinë deri kur mbushin 20 vjeç. Parimi “ius soli” si shpjegojnë ekspertët, nuk do të aplikohet për qytetarët europianë pasi lejet afatgjata të qëndrimit në Itali parashikohen vetëm për shtetet që nuk janë anëtare të BE-së.
Minorenë të tjerë që mund të përfitojnë nënshtetësinë janë edhe të huajt që kanë lindur në Itali ose që kanë hyrë në territorin italian përpara se të mbushin 12 vjeç, të ilët kanë frekuentuar rregullisht për të paktën pesë vjet sistemin publik të arsimit, ose kurse trajnimi apo formimi profesional tre apo katërvjeçarë.
Ndjekja e këtyre kurseve është e domosdoshme të ketë kulminuar me diplomim. Kërkesa për këta minorenë duhet bërë nga prindërit ose nga vetë i interesuari deri dy vjet pas mbushjes së moshës madhore.
Të huajt në Itali
Rregullat e reja për nënshtetësinë e fëmijëve në Itali vlejnë edhe për të huajt që kanë leje qëndrimi, por qe kanë tejkaluar afatet që parashikon ligji. Me hyrjen në fuqi të ligjit të ri për nënshtetësinë mund të aplikojnë edhe ata persona që e kanë kaluar limitin e moshës 20 vjeçare. Ata duhet të bëjnë kërkesën për nënshtetësi duke kërkuar mbrojtjen e të drejtave pasi që kanë banuar prej kohësh në këtë vend.
Ligji i ri për nënshtetësinë italiane ka nisur të diskutohet prej kohësh dhe fillimisht kishte 24 propozime të depozituara ndër vite, për të modifikuar ligjin 91/92. Sipas këtij ligji, nënshtetësia jepej sipas parimit ius sanguinis, duke lejuar transmetimin e nënshtetësisë nga prindërit tek fëmijët dhe nuk parashikonte asnjë aplikim tjetër.
Debati për këto modifikime ka qenë mjaft i ashpër dhe ka sjellë në ndryshimet e miratuara tashmë në dhomën e ulët të parlamentit me anë të të cilave hiqen disa kufizime në marrjen e nënshtetësisë. Në versionin e parë fare nënshtetësia jepej vetëm për ata persona që kishin të paktën një nga dy prindërit me banim të ligjshëm e të pandërprerë prej të paktën pesë vjetësh pas lindjes së fëmijës.
Forcat e djathta janë mundur të ndalin heqjen e kufizimeve për dhënien e nënshtetësisë fëmijëve të emigrantëve, me justifikime nga më të ndryshmet, pjesa më e madhe e të cilave fsheh frikën nga të huajt, thonë ekspertët. Por, edhe majtisti Beppe Grillo dhe partia e tij Pesë Yjet kërkoi vendosjen e një kushti ekonomik për marrjen e nënshtetësisë, atë të garancisë pasurore të prindërve.
Gjithsesi, ligji i ri që ka marrë jehonë në media dhe në publik, do të votohet edhe në senat përpara se të nisë nga zbatimi.
Përgatiti: Juli Prifti – /tesheshi.com/
