Rusia ka njoftuar se po tërheq një pjesë të trupave të saj nga kufiri me Ukrainën. Moska pretendon se trupat e përmendura kanë marrë pjesë në stërvitjet ushtarake që janë kryer sipas planit.
Duke gjykuar nga pamjet, tanket shfaqen duke u kthyer në bazat e tyre.
Ndërkohë, zëdhënësja e Ministrisë së Jashtme ruse Maria Zakharova shkroi:
“Sot do të hyjë në histori si dita kur propaganda e luftës perëndimore dështoi. Ata u turpëruan dhe u shkatërruan pa u gjuajtur asnjë plumb.”
Njoftimi i Rusisë shkaktoi edhe një reagim të rrufeshëm nga tregu. Rubla ruse u forcua kundrejt dollarit dhe euros në një kohë rekord.
“Mungesa e veprimit ushtarak dhe një tregues se ka një vullnet për të biseduar duket e mjaftueshme për të qetësuar tensionet e tregut”, tha Michael Leister, kreu i strategjisë së normave të interesit në Commerzbank.
Përpjekjet diplomatike për të gjetur një zgjidhje paqësore të krizës ukrainase nuk janë zbehur.
Të martën, kancelari gjerman Olaf Scholz do të takohet për herë të parë me presidentin rus Vladimir Putin në një mision të profilit të lartë për të parandaluar luftën dhe, si partneri më i madh tregtar i Rusisë në Evropë do të paralajmërojë për sanksione të gjera nëse sulmon Ukrainën.
Takimi në Kremlin pritet të zgjasë disa orë dhe në fund do të mbahet një konferencë e përbashkët për shtyp. /tesheshi.com/
