Shumë shqiptarë, nga ata të vetëdijshmit se ç’përfaqson Meta në politikën shqiptare, duhet të kenë shqyer sytë kur kanë parë lajmin mbi një letër që ky i fundit i ka drejtuar presidentit Nishani për të mbledhur Këshillin e Sigurisë Kombëtare…për kë do thoni?….për të diskutuar çështjen Balili, mosarrestimin e tij në kaq kohe.
Për të gjithë ata që ndoshta nuk janë plotësisht dhe thelbësisht të informuar, Klemend Balili, i etiketuar si “Eskobari i Ballkanit” është një ish-drejtor i LSI-së pas 13 qershorit, i emëruar në krye të Drejtorisë së Transporteve, Sarandë.
Deri në këtë emërim, ai nuk kishte kryer asnjëherë ndonjë funksion shtetëror. Klemend Balili, është një prej anëtarëve të një familjeje të njohur në Stjar të Delvinës, të lidhur në vite fort me PD-në, por kaluar në partinë e Metës pas ndarjes së këtij të fundit nga Berisha me marrëveshjen e 1 prillit 2013 me Ramë.
Vëllai i tij, Bako Balili drejton LSI-në Delvinë, me një ndikim të fortë dhe në Sarandë. Ndërsa i nipi, Rigers Balili, është kreu i Bashkisë së Delvinës, sigurisht nën siglën e LSI-së. Dhe e sotmja, letra e Metës adresuar Nishanit, përbën të parën herë që kreu i LSI-së artikulon emrin e njeriut të tij të kërkuar si trafikant droge me nam.
Por kjo kërkesë përbën një precedent ku një institucion i pavarur i kërkon kreut të shtetit të thërrasë një takim që është nomenklaturë e Presidentit.
Nga ana tjetër, përse rasti “Balili” duhet amballazhuar si çështje të sigurisë kombëtare?
Dhe realisht ç’mund të prodhojë ajo mbledhje ku do të jenë prezent përveç Nishanit, Metës e Ramës edhe Kryeprokurori Adriatik Llalla,; kryetari i Gjykatës së Lartë, Zaganjori; i asaj Kushtetuese, Dedja; kreu i SHISH, Visho Ajazi; ministri i Brendshëm, Tahiri; ai i Drejtësisë Manjani’ ministrja e Mbrojtjes Kodheli dhe Ministri i Transporteve Dervishi?
Sipas gjasave, do ketë një transmetim live ku do të mbahen titrat e televizioneve informative thuajse për 10 orë pa mbarim me deklaratat përkatëse; ose me një protokoll të shkruar ku mund të flasin të gjithë të pranishmit.
Po pse Meta nuk thërret kreun e Rendit në takim si kryetar Kuvendi, apo edhe në një interpelancë në Kuvend, ku si relator mund të diskutojë dhe Tahiri të paraqesë të gjithë informacionin që ka?
Nisma duket më shumë si një zgjerim i tryezës së diskutantëve sesa një afrim drejt së vërtetës.
Rasti “Balili” me misteret e tij është kthyer më shumë se një mankth politik sesa një çështje e rendit publik. Dhe ka gjasa të shërbejë më shumë si shoë. Por pas mbledhjes a do të kapet Balili më lehtë?
Gjithçka është vendosur pas një dalje të beftë të Donald Lu-së sot në drekë që ka folur për riaktivizimin e vettingut dhe të planit që e pason atë. Që do të thotë se asgjë nuk është anuluar nga ardhja e Trump-it.
Dhe njerëzit e Metës, këshilltarë të afërt shkruan nëpër rrjetet sociale që ambasadori është larguar. Po pse ky bllof?!
Disa thonë se Meta ka takuar një person shumë të njohur gjatë kohës që merrte pjesë në ceremoninë e Presidentit Trump në Uashington. Ai është aq i njohur sa që kreut të Kuvendit nuk ia merrte mendja se do ta takonte në SHBA. Por këto janë fjalë deri tani.
Ajo që ka rënë në sy është pikërisht dalja në publik e Donald Lu-së pas shkarkimit virtual që i bënë këshilltarët e Ilir Metës nëpër facebook.
Lu foli pak. Për reformën në drejtësi vuri në dukje se populli shqiptar e kërkon dhe e mbështet atë. Ai theksoi se ky vit që kemi përpara është “plot me sfida kur bëhet fjalë për zbatimin e reformës në drejtësi dhe zgjedhjet kombëtare.”
Pikërisht këtu duhet kërkuar urgjenca e Ilir Metës që thërret Nishanin për të tubuar një Këshill të Sigurisë Kombëtare që flet për një të kërkuar nga policia, por që mund të kthehet në një tubim paraelektoral ku ka gjasa të shpallen aleancat elektorale për zgjedhjet e 18 qershorit. /tesheshi.com/
