Stërvitja e përbashkët ndërmjet ushtrive ruse dhe serbe, ka sjellë një zhvillim të fortë dhe të papritur në lidhje me politikën në Ballkan.
Kancelarja gjermane, Angela Merkel, do të takohet nesër në Berlin me kryeministrin serb, Aleksandër Vuçiç, ku sipas mediave gjermane, pritet t’i kërkohet Beogradit që ta ndajë përfundimisht mendjen se me kë është me Rusinë apo me Perëndimin.
Shkak i vizitës së Vuçiç nesër në Gjermani është një axhendë në dukje “banale”, përkatësisht një takim i komisionit për BE-në të Bundestagut gjermane.
Zakonisht në të tilla takime shkojnë ministrat e jashtëm. Për rastin e Shqipërisë, ka qenë Ditmir Bushati në këtë takim. Por, siç mësohet Merkel do të takojë jashtë axhendës zyrtare Vuçiç për të sqaruar qëndrimin e Beogradit.
Situata me Rusinë ka konfrontuar fuqishëm NATO-n me Moskën dhe Aleanca ka përgatitur shtabe në kufi për t’iu përgjigjur një konflikti.
Mediat serbe raportojnë se dy zyrtarët do të bisedojnë për integrimin evropian të Serbisë dhe për krizën e refugjatëve.
Sipas burimeve të njëjta, nuk ka qenë e planifikuar që Vuçiç në Gjermani të takojë Merkelin, porse ai ka marrë “ftesë befasuese” nga këshilltari i kancelares gjermane.
Më herët është paralajmëruar se Vuçiç, të hënën në Berlin, do t’iu drejtohet anëtarëve të Këshillit për BE të Bundestagut.
/tesheshi.com/
