Futbollisti kroat Luka Modriç luajti ndeshjen e tij të fundit për Real Madridin të shtunën në stadiumin Santiago Bernabeu, ku kaloi 13 sezone dhe fitoi 28 trofe me klubin “Mbretëror”, duke marrë duartrokitje në këmbë në lamtumirën e tij.
“Ka ardhur momenti që nuk doja kurrë të vinte”, tha kapiteni 39-vjeçar i Real Madridit pas fitores 2-0 ndaj Real Sociedadit në ndeshjen e fundit të kampionatit spanjoll.
“Ka qenë një udhëtim i gjatë. Faleminderit klubit dhe presidentit Florentino Perez. Të gjithë trajnerëve, shokëve të ekipit dhe atyre që më ndihmuan gjatë gjithë kohës. Faleminderit nga thellësia e zemrës sime”, tha ai menjëherë pas ndeshjes.
Lamtumirë tifozëve
Tifozët me fanella të bardha me numrin 10 brohoritën emrin e tij dhe duartrokitën ndërsa ai përqafoi shokët e ekipit dhe anëtarët e familjes.
“Kemi fituar shumë. Kemi pasur momente të mrekullueshme, por trofeu më i madh që kam fituar është dashuria juaj”, tha ai para turmës që mbushte tribunat.
“Dua të them një frazë që pashë dhe më pëlqeu shumë: Mos qaj sepse mbaroi, por qesh sepse ndodhi”, tha ai.
Modriç i tha lamtumirë së bashku me trajnerin Carlo Ancelotti, i cili gjithashtu do të largohet nga klubi në fund të sezonit. /tesheshi.com/
