Duket si absurde, por në fakt është reale. Hyrja e të ashtuquajtit “kaubojsi” në Parlament, përkatësisht Eduard Ndocaj, ka qenë një lëvizje e pastër politike e dirigjuar nga lideri i Partisë Socialiste, Edi Rama.
Me largimin e thuajse të gjithë socialistëve nga lista e Lezhës, hyrja e një deputeti të LSI-së ishte e pashmangshme, gjë që do ta bënte fuqinë e partisë së Ilir Metës edhe më të madhe.
Sa e vërtetë është fakti i tensionit mes dy partive të mazhorancës e tregon edhe salla e boshatisur dhe mungesa e kuorumit në thuajse çdo të enjte.
Vetëm në seancën plenare të kësaj të enjteje, nuk u arrit të votohen dy ligje të rëndësishme që kërkonin 84 vota, vetëm si pasojë e mungesës edhe të deputetëve por edhe të angazhimit për një bashkëpunim.
Më shumë se njëherë, LSI ka bërë provën e “nëndetëses 105”.
Aktualisht partia e Ilir Metës në Parlament ka 20 deputetë që frikshëm ndalon çdo nisëm dhe mund të krijojë çdo aleancë. Nëse do të shtohej edhe një deputet i Lezhës. LSI do të rritej me 21 parlamentarë, duke i ulur frikshëm numrat e Partisë Socialiste që është sakatosur që në 2013-n, falë aleancës së koalicionit, por edhe me skandalet e vazhdueshme të arrestimit dhe largimit të deputetëve.
Aktualisht Partia Socialiste ka vetëm 63 deputetë dhe nëse i bashkohen 4 ose 5 të PDIU-së, bëjnë 67 apo 68, dhe si “varkë shpëtimi” mbeten dy votat demokristiane për të arritur kufirin dramatik të 70 votave: pra Nard Ndoka dhe Eduard Ndocaj.
PDK në zgjedhjet e fundit vendore firmosi marrëveshje me Edi Ramën dhe është pjesë e mazhorancës aktualisht.
Edhe pse tragjikomike, “kaubojsi” është “paracetamoli” fatal për të shpëtuar Edi Ramën nga dhimbjet e kokës që mund ti shkaktojë në një rast të mundshëm grupi konsident parlamentar i Lëvizjes Socialiste për Integrim.
/tesheshi.com/
