Bajerni i Mynihut i ka dhënë leksion Arsenalit, ndërsa e ka mposhtur me rezultatin e thellë 5-1 në Alianz Arena. Skuadra e Pep Guardiolës është hakmarrë për humbjen që pësoi dy javë më parë në Londër ndaj topçinjve, që pas disfatës së mbrëmshme rrezikojnë të mos e kalojnë grupin.
Tashmë grupi F kryesohet nga Bajerni me nëntë pikë, aq sa ka edhe Olimpiakosi, që përmbysi Dinamon e Zagrebit (2-1), për të qenë kështu shumë afër kalimit në turin tjetër.
Barcelona është lider i padiskutueshëm i grupit E. Blaugranasve nuk u nevojitet më Lionel Mesi, teksa vijojnë fitoret e njëpasnjëshme. Së fundmi ata mposhtën në shtëpi skuadrën bjelloruse Bate Borisov (3-0), dhe u mjafton vetëm një pikë në dy ndeshje për të ecur më tutje. Në duelin tjetër, Roma ka fituar dramën përballë gjermanëve të Bajer Leverkusenit (3-2), dhe tani pozicionohet e dyta në grup.
Skuadra e Jose Mourinho-s, Çelsi, po sheh dritë në fund të tunelit. Me mjaft vështirësi blutë e Londrës mposhtën Dinamon e Kievit (2-1), për të bërë një hap të rëndësishëm drejt kalimit në fazën tjetër. Porto ka kryer sa për formalitet udhëtimin në Izrael, ku nuk ka hasur rezistencë te Makabi i Tel-Avivit, i mundur 1:3.
Zeniti është skuadra e parë në grupin H që siguron kualifikimin për në fazën tjetër. Formacioni i drejtuar nga Andre Villas-Boas ka regjistruar fitoren e katërt radhazi në po kaq ndeshje, për të kryesuar grupin me pikë maksimale. Në këtë xhiro viktimë e rusëve janë sërish francezët e Lionit, që “rrihen” në shtëpi 0-2. Në duelin tjetër të grupit, Gent ka befasuar Valencian (1-0).
/tesheshi.com/
