Nga Mensur Krasniqi
Ka reaguar së fundi për një libër të thirrësit mysliman, Zakir Naik, edhe kreu u Bashkësisë Islame në Maqedoni, Reis Sulejman Rrexhepi. Libri hapi polemika për shkak të një fraze që u kap nga një sy gruaje në Panairin e Librit, poscaërisht shkrimtarja Flutura Açka, ku thuhej se “myslimani duhet të jetë terrorist…”. Por, nga padija apo keqdashësisht, zonja në fjalë e nxorri atë jashtë kontekstit duke ia servirur publikut në mënyrë literale, gjë që trazoi opinionin. Aty në fakt bëhet pak ironi me epitetin “terrorizëm”, ku thuhet se i vetmi terrorizëm që duhet të karakterizojë myslimanin duhet të jenë gjërat e urryera si vrasja, përdhunimi, grabitja, nëpërkëmbja e nderit të tjetrit etj.
Por kjo është bërë shkak që të nis një debat mbi kontrollin ndaj botimeve të ndryshme fetare që duhet të kenë institucionet përfaqsuese, siç janë Bashkësitë fetare të çdo vendi.
Më konkretisht, libri “Përgjigje jo myslimanëve, në pyetjet më të shpeshta ndaj islamit”, i autorit Zakir Naik, është botuar në Maqedoni, pa asnjë konsultë paraprake me institucionin e BFI-së. Reis Sulejman Rexhepi, numri 1 i komunitetit të beimtarëve në Maqedoni, edhe pse nuk e pranon keqintepretimin që i është bërë librit, a më saktë, tekstit kontravers që ka fjalën “terrorizëm”, thotë se botues të ndryshëm duhet të trokasin në derën e BFI-së për t`u konsultuar për librat që u ofrojnë lexuesve.
“Këtë shpjegim, unë nuk mund ta pranoj assesi për arsye se terrorizmi dhe Islami janë dy botë që nuk kanë asgjë të përbashkët. Bashkësia Islame ka një organ kompetent për botime, por që shumë pak i përgjigjen asaj. Atyre që e kanë botuar librin nuk ju ka shkuar ndërmend fare ta konsultojnë atë me institucionin e Bashkësisë Islame e të thonë që kemi ndërmend të përkthejmë një libër, kemi vlerësuar se është pozitiv apo negativ. Edhe për njërën edhe për tjetrën anë, kanë pasur mundësi të na konsultojnë”, tha reis Sulejman Rexhepi, kryetar i BFI-së.
Sakaq, në lidhje me kontrollin e përmbajtjeve të librave që hyjnë në vend, nga Ministria e Arsimit thonë se po shqyrtojnë mundësinë e ndryshimit të ligjit për të gjitha tekstet shkollore dhe ato jashtëshkollore.
“Jemi duke shqyrtuar mundësinë e ndryshimit të ligjit për tekstet shkollore i cili do të mundësonte një procedurë më transparente, më fleksibile, procedurë e cila do të nënkuptonte përfshirjen e autorëve të ndryshëm ose autorëve të përkatësive të ndryshme etnike në përpilimin e një teksti shkollor, dhe veçanërisht tekstet shkollore që kanë të bëjnë me identitetin dhe specifikat e popujve që jetojnë në Republikën e Maqedonisë”, deklaroi Abdilaqim Ademi, Ministër i Arsimit dhe Shkencës.
Libri i autorit Zekir Naik është botuar që më 2010 dhe është përkthyer fillimisht në boshnjakisht, në shqip dhe maqedonisht. Në faqen 49 të tij thuhet se cdo mysliman duhet të jetë terrorist ndaj faktorëve negativ të shoqërisë, atyre që vrasin, vjedhin e përdhunojnë”. Ndryshe ky libër gjendet edhe në Bibliotekën Universitare Kombëtare. /tesheshi.com/
