Shpenzimet ekstra që përfaqëson fluksi i madh i refugjatëve në shtetet e Bashkimit Europian po përdoren nga disa prej tyre si arsyetim për të mos zbatuar rregullat strikte të vendosura nga Brukseli për deficitin buxhetor.
Një gjë të tillë e ngriti si shqetësim edhe ministri gjerman i Financave, Schäuble duke thënë se Greqia nuk është shqetësimi më i madh i Evropës për momentin.
“Ne kemi edhe probleme të tjera në Gjermani, me të cilat duhet të merremi”, tha ministri gjerman i Financave duke iu referuar krizës së refugjatëve.
Kështu, Austria, Italia dhe Franca po kërkojnë që shpenzimet e tyre për strehimin e refugjatëve dhe integrimin të përjashtohen nga përllogaritjet e deficitit buxhetor. “Pakti i Stabilitetit dhe i Rritjes, i cili parashikon një kufi deficiti prej tre për qind, duhet të trajtohet “më fleksibël”. Komisioni Evropian duhet të paraqesë një propozim për këtë”, është arsyetimi I këtyre shteteve, komenton DW.
Ministri gjerman i Financave Schäuble, i cili e sheh “fleksibilitetin” më tepër në mënyrë kritike, tha se është i bindur se Komisioni Evropian do të marrë në konsideratë “sipas rregullave ekzistuese” çështjen e refugjatëve në vlerësimin e buxheteve. Por ai tha se i duket megjithatë “çuditshme”, që shtete që deri tani nuk kanë bërë shumë për çështjen e refugjatëve, papritmas ngrenë tani zërin për dobësimin e paktit. /tesheshi.com/
