Turma e njerëzve dhunoi dhomën ku faleshin besimtarët myslimanë në Korsikë, një ditë pasi dy zjarrfikësve që iu përgjigjën një telefonate për ndihmë, iu zu pritë e u plagosën në një zonë ndërtimi. Prefekti në ishullin francez, Christophe Mirmand tha se kishte kërkuar përforcime nga kontinenti për t’i vendosur në kryeqytetin e Korsikës, Ajaccio. Sallat e lutjeve dhe xhamitë janë marrë nën mbrojtje nga policia.
Dy hetime të veçanta janë hapur në këtë ishull, një për sulmin mbi zjarrfikësit dhe tjetri për dëmtimin e dhomës së lutjeve.
Tensionet janë shtuar së tepërmi në ishullin e Mesdheut. Dhuna nisi natën e së enjtes kur zjarrfikësit iu përgjigjën një telefonate për ndihmë e u zunë në pritë në një projekt ndërtimi në kodrat e Ajaccio-s. Nuk është e qartë se çfarë nxiti këtë sulm.
Por, ende pa u sqaruar incidenti, një turmë prej 600 personash në një manifestim që nisi si shprehje solidariteti me zyrtarët e plagosur, degjeneroi në dhunë kur me dhjetëra njerëz iu drejtuan një salle lutjesh.
Ata hodhën objekte të ndryshme dhe u përpoqën të djegin Kuranin dhe librat e faljes, thanë zyrtarët. Turma gjithashtu shkatërroi edhe një dyqan qebapësh.
“Të gjitha këto ngjarje janë të lidhura”, tha prefekti Mirmand. Regjistrimet tregojnë se disa persona në turmë thërrisnin: Kjo është shtëpia jonë”, përpara se të dëmtohej salla e lutjeve.
Kryeministri i Francës, Manuel Valls, bëri thirrje për të respektuar ligjin francez pas “agresionit të patolerueshëm ndaj zjarrfikësve dhe akteve profane të sulmit ndaj një vendi mysliman lutjesh”.
Ministri i Brendshëm, Bernard Cazeneuve dënoi përgjegjësit për sulmin ndaj zjarrfikësve. Ai tha gjithashtu se veprimet e patolerueshme ndaj vendeve të besimit, përmbanin gjurmë të racizmit dhe ksenofobisë e nuk do të kalonin të pandëshkuara./tesheshi.com/
