Gjermania vlerëson se Izraeli nuk e përmbushi premtimin e tij për të lejuar një sasi më të madhe ndihme humanitare për popullsinë palestineze të Rripit të Gazës.
Kancelari Friedrich Merz i ka bërë përsëri thirrje kryeministrit izraelit Benjamin Netanyahu qw të lejojë kalimin e ndihmës emergjente.
Merz dhe Netanyahu folën në telefon të dielën në mbrëmje, njoftoi zëdhënësi i qeverisë Stefan Kornelius të nesërmen.
Udhëheqësi gjerman kërkoi që Izraeli të lejojë urgjentisht rrjedhën e sasive të mjaftueshme të ndihmës humanitare dhe të sigurojë shpërndarjen e saj të sigurt.
Hamasi akuzoi forcat izraelite se hapën zjarr ndaj njerëzve që prisnin në radhë për ushqim të dielën. Sipas burimeve palestineze, u vranë 30 persona.
Kancelari i ri kohët e fundit e ka ashpërsuar qëndrimin e tij ndaj qeverisë izraelite, duke vënë në pikëpyetje strategjinë e saj ushtarake në kontekstin e krizës humanitare që ka shkaktuar.
Merz dhe Ministri i Jashtëm gjerman Johann Wadephul vlerësuan se Izraeli nuk e kishte përmbushur premtimin e tij për t’i siguruar popullsisë furnizime më të gjera dhe të sigurta përmes kanalit të ri të shpërndarjes së ndihmës izraelito-amerikane, i hapur më 25 maj.
Autoriteti Palestinez i kontrolluar nga Hamasi thotë se ofensiva izraelite në Rripin e Gazës ka marrë më shumë se 53,000 jetë, ndërsa organizatat humanitare paralajmërojnë se popullsia është në rrezik nga uria dhe sëmundjet për shkak të bllokadës izraelite të ndihmës. /tesheshi.com/
