Ishte vitit 1999. Shqipëria ishte mbushur me të ardhurit nga Kosova që me vështirësi po integroheshin ashtu nga pak në kampin e Kukësit por edhe në Shqipëri.
Në Pallatin e Sportit “Asllan Rusi” ishin mledhur shumica e të ardhurve ku pas një ndenje të shkurtër shpërndaheshin duke u merreshin nga familje, apo biznesmenë në familjet e tyre.
Paralel me panoramën e Tiranës, në Bllacë të Maqedonisë ishte një kamp i madh, ku refugjatët nga Kosova trajtoheshin në mënyrë çnjerëzore dhe pamjet e tyre bënë xhiron e botës.
Në ato ditë, në “Asllan Rusi”, Blendi Fevziu improvizon një studio debati, ku merr pjesë ministri i Kulturës i asaj kohe, Edi Rama dhe ambasadori i Maqedonisë në Tiranë, Risto Nikovski.
Kush e mban mend, pati një përplasje të fortë mes të dyve dhe fjalët e Ramës ishin: “Unë nuk do të doja të isha në lëkurën e ambasadorit për të justifikuar mëynxyra të tilla”.
Rasti e solli që sot Edi Rama është kryeministër i Shqipërisë dhe Risto Nikovski është strategu i Nikolla Gruevskit dhe këshilltari kryesor i presidentit të Maqedonisë, Gjeorgje Ivanov.
Ish-ambasadori ka rinisur një luftë personale me Ramën, rivalin që e turpëroi para botës në transmetim live. Dhe duket se nuk e ka harruar.
Në specialen që transmetoi Sputnik dje, Nikovski e akuzoi Ramën se ka udhëhequr operacionin për të bërë Platformën Shqiptare, marrjen e 70 mijë votave prej shqiptarëve nga Zoran Zaev dhe bërjen e tij kryeministër i Maqedonisë.
Këshilltari i Ivanov thotë se gjithçka është bërë nga SHBA dhe Edi Rama: Ishte një strategji e sofistikuar dhe e organizuar pasi 70,000 shqiptarë votuan për opozitën, sepse ajo premtoi se do të bëjë federalizmin”, tha Nikovski, i cili vazhdon: “Pastaj ndërhyri dhe Tirana, e cila ka bërë një platformë ku kërkohet një ridefinim i plotë i shtetit, duke pasur parasysh se LSDM-ja opozitare është e gatshme për t’u dhënë koncesione shqiptarëve e kjo do të thotë fundi i shtetit unitar dhe rruga për federalizim”.
Redaksia qëndrore e Sputnik ka aktivizuar të gjithë artilerinë e rëndë të saj kundër shqiptarëve.
E urdhëruar nga Moska, Sputnik në Ballkan ka transmetuar në radio dhe online një speciale të gjerë ku sulmon dhe tenton të frenojë faktorizimin e shqiptarëve në Maqedoni por edhe në Kosovë.
E titulluar “Kosova dhe Maqedonia Shqipëria e Madhe”, Sputnik e vulos ashtu si qeveria e Gruevskit se “kriza aktuale në Maqedoni është mbjellë nga jashtë, me qëllim që vendi të federalizohet, si që përfaqëson hapin e fundit drejt krijimit të një Shqipërie të Madhe”.
Këshilltari i Ivanov, Risto Nikovski, i cili urrejtjen për Edi Ramën duket se e ka të mbajtur gjallë që prej 18 vjetësh, e akuzon si organizatorin e çdo gjëje.
Nikovski, thekson se pavarësia e Kosovës ishte fillimi i projektit apo pjesa më e madhe e tij, ndërkohë që bashkimin e shqiptarëve në një shtet e cilëson thjesht proces teknik.
Dhe pikërisht në këtë pikë, Sputnik e lidh presionin që duhet të bëjnë popujt sllavë për të ndaluar krijimin e qeverisë së Zoran Zaevit me shqiptarët.
Ristovski thekson se koka e këtij projekti ndodhet në Uashington dhe shton se vetëm për këtë gjë u bombardua Beogradi.
“Pas rënies së Jugosllavisë, ishte hera e parë që Shtetet e Bashkuara u bë një faktor në Ballkan, pasi në të kaluarën kanë qenë britanikët, francezët, rusët dhe gjermanët.
Pastaj SHBA formoi një partneritet me shqiptarët, aleanca më e rrezikshme për rajonin. SHBA punon dhe tani dhe është duke e zbatuar skenarin e saj tani në Maqedoni.
Prandaj, kur ju lexoni Platformën e Tiranës, shihni se kjo është një politikë që është duke u zbatuar 25 vitet e fundit,” përfundon Nikovski.
Slobodan Jankoviç, një analist tjetër ka shtuar se aspiratat shqiptare nuk përfundojnë me Kosovën dhe një pjesë të Maqedonisë, por ato duan dhe disa pjesë të Serbisë, pastaj Malin e Zi, dhe më në fund Greqinë, duke iu referuar Çamërisë.
Pra rusët kanë nisur alarmin e madh, duke akuzuar Edi Ramën që jo vetëm kërkon Maqedoninë tashmë por edhe Preshevën e Çamërinë.
Thua të jetë thjesht një plan propagandistik apo një strategji amerikane për shqiptarët në Ballkan?!
Turbullirat rajonale tregojnë se gjërat po lëvizin… /tesheshi.com/
