“Eshtë e mundshme dobësimi i ISIS duke goditur strukturën financiare të grupit? Jo, jo pa një ndryshim domethënës të menaxhimit botëror të ekonomisë”.
Roberto Saviano shkruan në mënyrë të qartë e të drejtpërdrejtë në faqen e komenteve të gazetës prestigjioze amerikane, New York Times një gazetë historike që lexohet nga klasa drejtuese e gjithë botës.
Bllokimi i kanaleve të financimit për ISIS, drogës, naftës, financimeve private, kontrabandës së objekteve arkeologjike “do të thotë të rishikosh ekonominë botërore. Franca, sikundër më parë edhe Shtetet e Bashkuara, po paguan një çmim shumë të lartë për mëkatin e mungesës së vëmendjes”.
Në Amerikë, debati për ISIS dhe sesi mund të mposhtet grupi është shumë i ndezur. Zgjedhja e Obamës për të mos ndërhyrë me trupa tokësore por për të përdorur sulmet ajrore dhe aleatët rajonalë, është shumë e debatuar. Në faqen online të New York Times ekziston një hapësirë speciale e dedikuar për debatin për luftën ndaj ISIS ku janë shfaqur herë pas herë ndërhyrje nga analistë e intelektualë nga e gjithë bota.
Autori i “Gomorra”-s dhe librit tjetër “ZeroZeroZero”, në komentin e vet, citon Antonio Maria Costa, ish-zyrtarin e OKB-së për kriminalitetin e trafikun e drogës dhe dokumentet e Wikileaks, që mes të tjerave pohojnë edhe sesi FBI-ja amerikane ishte në dijeni të “marrëdhënies së interesit” mes krimit të organizuar italian dhe ekstremistëve islamikë.
Receta që jep Saviano është e qartë: “Qeveritë duhet të heqin dorë nga tolerimi i organizatave kriminale. Trafikut të drogës dhe pastrimit të parave të pista”. Të luftosh ISIS, sipas tij, do të thotë të luftosh një armik në shtëpi, të ndryshosh rregullat e brendshme.
Shkrimtari Italian kujton se organizatat terroriste financohen përmes trafikut të drogës e armëve dhe citon rastin e Captagon, miksimit të anfitaminave dhe kafeinës që përdoret nga shumë militantë të grupit, sipas të dhënave të shërbimeve sekrete. Në Aleppo, në vitin 2014, ISIS mori kontrollin e një fabrike që prodhonte drogë, nga e cila policia saudite ka konfiskuar me miliona pilula.
Përgatiti Juli Prifti – /tesheshi.com/
