Kancelari gjerman Friedrich Merz kritikoi të hënën hapur dhe drejtpërdrejt sulmet e Izraelit në Rripin e Gazës për herë të parë.
“Rrezikimi i popullsisë civile në një masë të tillë, siç po ndodh gjithnjë e më shumë ditët e fundit, nuk mund të justifikohet më me luftën kundër Hamasit”, tha kancelari gjerman Friedrich Merz dhe shtoi, duke komentuar rastin e vdekjes së fëmijëve në një shkollë, se “ai nuk e kupton më qëllimin me të cilin ushtria izraelite po vepron aktualisht në Rripin e Gazës”.
Merz e paralajmëroi qeverinë e Benjamin Netanyahut se miqtë e Izraelit nuk mund të tolerojnë gjithçka që bën ajo.
“Qeveria izraelite nuk duhet të bëjë diçka që as miqtë më të mëdhenj të Izraelit nuk mund ta tolerojnë në një moment të caktuar”, tha Merz në një diskutim publik në transmetuesin publik ËDR në Berlin.
Kancelari gjerman tha se Gjermania, “më shumë se çdo vend tjetër në botë”, duhet të përmbahet nga kritikat ndaj Izraelit: “Gjermania, si asnjë vend tjetër, duhet të përmbahet nga kritikat e hapura ndaj Izraelit… Por kur kalohen kufij të caktuar, kur shkelet ligji ndërkombëtar, atëherë kancelari gjerman duhet të flasë hapur.”
Kancelari gjerman ka njoftuar se do të flasë me kryeministrin izraelit këtë javë dhe do ta paralajmërojë atë “të mos e teprojë” me veprimet kundër Gazës.
Dhjetëra njerëz, mes tyre fëmijë, u vranë ose u plagosën pas sulmit izraelit të mbrëmshëm në një shkollë që strehonte persona të zhvendosur në Gaza. Nga ana tjetër, ndihma humanitare po i arrin popullsisë së Gazës me një ritëm të pamjaftueshëm, duke ccuar në krizë urie. /tesheshi.com/
