Nga Bashkim Kastrati
Ata që do të duhej ta luftonin korrupsionin, po dalin të jenë vetë të korruptuar. Institucionet e drejtësisë janë tronditur nga tri arrestime që janë bërë ndaj krerëve të prokurorisë dhe një kryetari të gjykatës.
Fjala është për arrestimin e Nazmi Mustafit, që ishte shef Task Forcës kundër korrupsion, mekanizëm që u krijua enkas për luftimin e korrupsionit. Ndërsa këtë vit brenda një periudhe dymujore është arrestuar kryetari i Gjykatës së Apelit të Republikës së Kosovës, Salih Mekaj dhe prokurorja për krime të rënda Vahide Badivuku. Të tre këta zyrtarë në vend se të luftonin korrupsionin dhe keqpërdorimet, u bënë pjesë e tyre dhe njerëzve që i kryenin ato.
Këto janë rastet e krerëve të institucioneve të lartpërmendura, sepse në vitet e fundit ka pasur raste të tjerëve sidomos të gjyqtarëve që janë arrestuar dhe burgosur për keqpërdorim të detyrës zyrtare. Kryetari i Gjykatës Komunale në Prishtinë, Nuhi Uka, bashkë me 7 gjyqtarë të tjerë tashmë janë dënuar, po ashtu të dyshuar për korrupsion. Prapa grilave mbetet edhe gjyqtari Kolë Pukaj.
Sipas Zyrës së Prokurorit Disiplinor deri tash janë iniciuar rreth 270 parashtresa, ku prej tyre 29 raste janë iniciuar për hetim, duke përfshirë edhe gjyqtarë dhe prokurorë.
Ndërsa vetëm në vitin 2015 janë hapur 29 hetime, 13 hetime janë hapur ndaj gjyqtarëve dhe 16 hetime janë hapur ndaj prokurorëve dhe prej tyre 10 raste janë dërguar në procedurë disiplinore të Këshillit Prokurorial të Kosovës. Ndërsa shtatë raste ndaj gjyqtarëve janë dërguar në komisionin disiplinor tek Këshillit Gjyqësor të Kosovës.
Rasti i shefit të Task Forcës kundër korrupsionit Nazmi Mustafi
Policia e Kosovës me 2 prill të vitit 2012 e ka arrestuar Nazmi Mustafin dhe dy persona të tjerë nën dyshimet se ka pranuar ryshfet nga Pashk Mirashi, ish-likuidator i Bankës Kreditore të Prishtinës. Mirashi, ish-likuidator i Bankës Kreditore të Prishtinës, ka ofruar dëshmi për prokurorë të EULEX-it se i ka dhënë një shumë të majme parash ryshfet, shefit të Task Forcës kundër korrupsionit Nazmi Mustafi.
“Veprat që janë duke u hetuar përfshijnë, Shpërdorim të detyrës ose autoritetit zyrtar, ushtrim i ndikimit, marrje dhe dhënie e ryshfetit,” pati sqaruar policia.
Mustafi dyshohej po ashtu edhe për raste tjera për hetime apo të akuzave që ka ngritur duke marrë ryshfet për t’i liruar ata nga akuza. Ai kishte akuzuar edhe ish-guvernatorin e Bankës Qendrore të Kosovës, Hashim Rexhepi ku të pesë akuzat nuk janë konfirmuar dhe i cili është liruar.
Për këto vepra, në vitin 2013 Mustafi u gjet fajtor dhe u dënua me 5 vjet burgim dhe me gjobën prej 10 mijë eurosh. Ndërsa në tetor të vitit 2014 Gjykata e Apelit me një vendim të saj ka vendosur që të ulë dënimin për Mustafin nga pesë vjet në tre vjet e gjashtë muaj burg.
Arrestohet edhe prokuroja e krimeve të rënda Vaide Badivuku
Rasti i arrestimit të Mustafit, nuk mbeti i vetëm, para tri ditëve me urdhër të Prokurorisë Speciale të Republikës së Kosovës është arrestuar prokurorja e Departamentit të Krimeve të Rënda në Prokurorinë Themelore të Mitrovicës Vaide Badivuku si dhe dy persona të tjerë të përfshirë në veprat e dyshuara penale.
Prokuroria Speciale ka sqaruar se prokurorja Vahide Badivuku është arrestuar nën dyshimin se ka marrë ryshfet për t’i liruar disa vetura të sekuestruara, në një lëndë penale, të cilën ajo e ka pasur në hetime.
“E pandehura V.B ka kërkuar ryshfet në shumën prej 22 mijë euro përmes ndërmjetësuesve dhe pas dorëzimit të shumës në fjalë, si prokurore e rastit ka përpiluar kërkesën për lirim të automjeteve.
Mbrëmë gjatë kontrollit në pikë kalimin kufitar në Merdare, është kontrolluar e pandehura V.B. dhe në çantën e saj janë gjetur shuma prej 5.000 euro, të cilat janë pjesë e 22 mijë eurove të pranuara ryshfet”, thuhet njoftimin e prokurorisë speciale.
Ndryshe, Badivuku ka qenë prokurore e cila e ka hetuar ish-deputetin e Kuvendit të Kosovës, Gani Gecin për veprën penale të vrasjes. Ndërsa ende pa e ngritur aktakuzën ndaj tij, ajo kishte paraqitur kërkesë që i pandehuri Geci të lirohet nga masa e paraburgimi.
Edhe kryetari i Gjykatës së Apelit Salih Mekaj i përfshirë në korrupsion
Përveç dy prokurorëve të lartcekur, me urdhër të prokurorisë speciale, me 20 korrik të vitit 2015 është arrestuar edhe kryetari i Gjykatës së Apelit, Salih Mekaj.
“Urdhër ndalimin për 48 orë prokuroria e ka bërë për shkak të dyshimit të bazuar se kryetari Mekaj ka kryer veprat penale “Keqpërdorimi i pozitës apo autoritetit zyrtar” , nga neni 422 të Kodit Penal të Republikës së Kosovës dhe veprës penale “Ushtrimi i ndikimit”, nga neni 431 paragrafi 1 të Kodit Penal të Republikës së Kosovës”, thuhet në njoftimin e Prokurorisë Speciale të Kosovës.
Së bashku me Mekajn është arrestuar edhe Vlora Gorani e cila dyshohet se ka kryer veprën penale të dhënies së ryshfetit. “Salih Mekaj e kishte telefonuar Vlora Goranin dhe i kishte thënë se do të takohet me gjykatësen e rastit dhe më pas pasi të takohet me të për t’i treguar se si ka shkuar takimi”, shkruan në dosjen e lëndës.
Pas kësaj bisede policia kishte vëzhguar takimin e Mekajt me gjykatësen nga Peja Lumturie Muhaxheri. Të dy ishin takuar në një lokal të Prishtinës gjatë muajit korrik. E në lidhje me këtë çështje ka reaguar edhe Këshilli Gjyqësor i Kosovës (KGJK). Ky këshill thotë se dënon çdo sjellje të kundërligjshme, aq më tepër nëse veprimi i tillë kryhet duke keqpërdorur pozitën zyrtare. Andaj, Këshilli Gjyqësor i Kosovës thotë se do të përcjellë nga afër këtë rast dhe do të iniciojë me kohë mekanizmat e brendshëm disiplinorë duke i njoftuar të gjithë mbi masat e ndërmarra.
/tesheshi.com/
