Vlora u trondit këtë të hënë nga një ngjarje e rëndë. Një 55-vjeçar me profesion inxhinier, ndërtues gjithashtu, humbi jetën nga e rrahura e një 33-vjeçari, pasi një sherri mes tyre për një mosmarrëveshje mes tyre.
Jetëhumburi është Armando Meshau, ndërsa ai që i morri jetën është i riu Rei Meta. Të rëndë këtë ngjarje e bën fakti se ky i fundit është i biri i një gruaje të pushtetshme në drejtësi, Nurihan Seiti Meta, anëtare e Këshillit të Lartë të Prokurorisë.
Sipas disa raportimeve mediatike, Rei Meta i kishte premtuar Armando Meshaut zgjidhje për një pronë, duke përdorur emrin e të ëmës, që si shpërblim do kishte një hyrje apartamenti. Dhe pikërisht nga banesa e premtuar ka lindur mosmarrëveshja, e cila çoi në përplasje fizike me pasoja fatale. Kjo pasi Meta kishte dështuar në rolin e tij si sekser dhe 55-vjeçari kishte zgjidhur çështjen që e shqetësonte duke shfrytëzuar lidhjet me palë të treta.
Për rastin e rëndë, Policia lëshoi këtë komunikatë zyrtare:
“Në lidhje me ngjarjen e ndodhur rreth orës 11:45, në një qendër interneti, në lagjen ‘Hajro Çakërri’, ku gjatë një konflikti për motive të dobëta, ndërmjet 2 shtetasve, për shkak të dhunës fizike të ushtruar ndaj tij (goditjeve me grushte), humbi jetën shtetasi A. M., ju informojmë se: Si rezultat i reagimit të menjëhershëm të shërbimeve të Policisë, u bë i mundur identifikimi, kapja dhe arrestimi i autorit të këtij rasti, shtetasit R. M., 33 vjeç, banues në Tiranë, i cili aktualisht është shoqëruar në ambientet e Policisë, për kryerjen e veprimeve të mëtejshme procedurale”. /tesheshi.com/
.
