Autoritetet izraelite nuk do të lejojnë ministrat e jashtëm arabë që planifikuan të merrnin pjesë në një samit në Ramallah, kryeqytetin administrativ të territoreve palestineze në Bregun Perëndimor të pushtuar, raportoi dje media izraelite.
Channel 12 raportoi se delegacioni që planifikon të udhëtojë për në Ramallah do të përfshijë ministrat e jashtëm të Jordanisë, Egjiptit, Arabisë Saudite dhe Emirateve të Bashkuara Arabe.
Deri më tani, as qeveria izraelite dhe as ato të shteteve arabe përkatëse nuk kanë komentuar mbi informacionin.
Më herët dje, një burim i AFP në ambasadën palestineze në Riad tha se ministri i Jashtëm saudit Faisal bin Farhan po planifikonte të bënte një vizitë historike në Ramallah – e para nga një zyrtar i lartë saudit që nga lufta e vitit 1967.
Ndërsa monarkia e Gjirit bën thirrje për krijimin e një shteti palestinez, ministri izraelit i Mbrojtjes, Yisrael Katz, deklaroi se “ne do të ndërtojmë një shtet hebre izraelit” në Bregun Perëndimor të pushtuar, duke njoftuar ndërtimin e 22 vendbanimeve të reja në zonë, pavarësisht se ato konsiderohen të paligjshme sipas ligjit ndërkombëtar.
Vizita u planifikua gjithashtu në sfondin e luftës shkatërruese në Rripin e Gazës, ku OKB thekson se “100%” e popullsisë është në rrezik të vdesë nga uria mes konfliktit të armatosur 20-mujor. /tesheshi.com/
