Zyrtarë amerikanë kanë njoftuar se për herë të parë në bisedimet për të ardhmen e Sirisë është ftuar dhe Irani. Një raund i ri i këtyre bisedimeve mund të nisë të enjten në Vjenë, por, me gjithë ftesën, ende nuk ka një përgjigje nga autoritetet iraniane.
Irani është aleati më i ngushtë i regjimit të Beshar Esadit, së bashku me Rusinë, dhe ftesa për të marrë pjesë në bisedimet përbën një zhvillim të ri domethënës.
Në bisedimet e së enjtes do të ketë një sërë zyrtarësh të lartë, duke nisur nga sekretari amerikan i Shtetit, John Kerry, e ministri i Jashtëm rus, Sergey Lavrov, përfshirë dhe një numër diplomatësh europianë dhe arabë.
Zyrtarët amerikanë që e dhanë lajmin nuk ishin të autorizuar të flisnin publikisht, veçse shpjeguan se ftesa për Iranin është bërë nëpërmjet Rusisë.
Arabia Saudite e ka kundërshtuar më herët pjesëmarrjen e Iranit në bisedime, por pas diskutimeve të gjata me amerikanët duket se ka ndryshuar qëndrim.
Javën e shkuar pati gjithashtu një takim të shefave të diplomacisë amerikane, ruse, saudite dhe turke po në Vjenë, i cili u mbyll pa një rezultat konkret. /tesheshi.com/
