Britania do të shpenzojë një shumë rekord prej tre miliardë paundësh (3.57 miliardë euro) për të rritur mundësitë e trajnimit, njoftoi qeveria të martën, si pjesë e një strategjie më të gjerë për të trajnuar njerëzit e saj për të mbushur boshllëqet në tregun e punës dhe për të zvogëluar varësinë nga punëtorët e huaj.
Investimi do ta “orientojë sistemin e aftësive drejt talenteve të reja vendase” duke krijuar 120,000 mundësi të reja trajnimi në sektorë kyç si ndërtimi, inxhinieria, shëndetësia dhe kujdesi social, si dhe sektori dixhital, tha Ministria e Arsimit e qeverisë në një deklaratë.
Më shumë se një e pesta e britanikëve nuk kërkojnë punë
Më shumë se një e pesta e britanikëve në moshë pune janë të papunë dhe nuk kërkojnë punë, dhe shifrat e fundit zyrtare tregojnë se shkalla e inaktivitetit është 21.4 përqind dhe është rritur vazhdimisht që nga pandemia Covid-19.
Qeveria laburiste ka qenë nën presion për të ulur imigracionin pas suksesit të partisë së krahut të djathtë, anti-imigracion, Reform UK në zgjedhjet lokale në maj, dhe që atëherë ka hartuar plane për të shtrënguar rregullat e shtetësisë, për të kufizuar vizat për punëtorët e kualifikuar vetëm në vende pune për të diplomuarit dhe për të inkurajuar kompanitë të trajnojnë punëtorët vendas.
Kryeministri Keir Starmer tha se “eksperimenti i kufijve të hapur ka mbaruar” kur u prezantuan masat.
Varësia nga migrantët
Gjithashtu të martën u njoftua se një rritje e planifikuar prej 32 përqind e tarifës për punësimin e punëtorëve të huaj përmes vizave do të sigurojë deri në 45,000 vende shtesë trajnimi, duke “forcuar kështu fuqinë punëtore vendase dhe duke zvogëluar varësinë nga migrantët” në sektorët prioritarë.
Kompanitë thanë se nuk mund të gjenin mjaftueshëm fuqi punëtore në tregun vendas dhe paralajmëruan se rregullat më të rrepta mund të dëmtonin ekonominë, nëse nuk shoqërohen me një ristrukturim themelor të sistemit të trajnimit profesional të vendit. /tesheshi.com/
