Edi Rama ishte në Shkodër në përkujtimin e meshës së parë katolike pasi komunizmi mori tatëpjetën në Shqipëri. Por pak kush e di se Edi Rama e ka nisur aty, pikërisht në varrezat e Rrmajit, rrugën e tij drejt karriges së kryeministrit…
Në tetorin e vitit 1990, Ramiz Alia dërgoi në Shkodër një zyrtar të lartë të PPSH-së, i cili takoi një prift dhe një hoxhë që sapo kishin dalë nga burgu komunist. Ata ishin Simon Jubani dhe Sabri Koçi. Ai u përcolli porosinë e Alisë se tashmë në Shqipëri lejohej kryerja e riteve fetare, veç duhej një nisje e dalëngadaltë, jo e menjëhershme, prej drojes se mund të ngjallte kundërshti te konservatorët e Byrosë Politike. Pra, ata duhej të prisnin disa ditë nga miratimi i dekretit të Presidiumit të Kuvendit Popullor (organi që përfaqësonte kreun e shtetit).
Në fakt, perlati katolik Dom Simon Jubani nuk është se priti shumë. Ai vendosi që më 4 nëntor ta mbajë meshën e parë, dhe si vend për këtë zgjodhi mauzoleun e varrezave private katolike të Rrmajit.
Ngjarja bëri shumë bujë jo vetëm prej transmetimit të menjëhershëm nga RadioVatikani dhe Zëri i Amerikës, por edhe prej shumë emrave të njohur të rretheve intelektuale që vinin nga Tirana. Mes tyre ishin Edi Rama, Ardian Klosi, Aurel Plasari, Spartak Ngjela, etj.
Dhe, në fakt, pas meshës, Simon Jubani, Ndrek Bazhdari, Tomaso Sheldia dhe disa figura të njohura të intelektualëve të Shkodrës, së bashku me Ramën, Klosin e Plasarin, mbajtën një takim për krijimin e “partisë” së parë politike antikomuniste, ku të përfshiheshin thuajse të gjitha figurat e dënuara nga regjimi komunist, përgjithësisht intelektualë të spikatur.
Por ky grupim “vdiq” që në lindje prej presionit të madh pas krijimit të PD-së në dhjetorin e vitit 1990. Në Shkodër u përfol atëherë që një drejtues i PD-së, e më pas një nga krerët e shtetit, e takoi Dom Simonin dhe i tha: “Mos don me kriju parti ti?” “Po ash pune e marume,” ia ktheu meshtari. “As mos e mendo,” do t’i përgjigjej politikani; flitej se paralajmërimi i këtij të fundit ka qenë “mjaft i tmerrshëm”. Që nga ajo ditë Dom Simon Jubani dhe politikani që u përplas me të nuk patën një ditë të qetë. Prifti e akuzonte vazhdimisht si “spiun birucash”.
Ndërkaq, edhe pse ishte meshtari i parë pas shkërmoqjes së komunizmit, vetë Dom Simon Jubani u degdis në Mirditë si perlat i thjeshtë. Ndërsa grupi i intelektualëve që “morën pjesë në lëvizje” u anatemua e u sulmua egërsisht.
Deri në ditën kur Edi Rama do të zgjidhte të merrte partinë së cilës i doli kundër në 1990-ën dhe që kërkoi ta nxjerrë jashtë ligjit… /tesheshi.com/
