Diskutimi mbi kriminalizimin e shpifjes është më i fundit debat i shpërthyer në ambientin e përgjithshëm shoqëror, politik e jo të tillë. Ky kriminalizim i shpifjes është paraqitur si një përpjekje e hapur për t’u mbyllur gojën mjeteve të informimit.
Ka qenë vetë kryeministri i vendit, Edi Rama, që është përfshirë në këtë debat, dhe që ka sqaruar nëpërmjet rrjeteve sociale elektronike.
Ja ç’shkruan ai, duke e mohuar lidhjen e kriminalizimit të shpifjes me shtypin: “Asnjë lidhje me shtypin kriminalizimi i shpifjes!”
Për të vijuar më pas me objektivin e këtij ligji: “Jo, shpifja duhet të jetë vepër penale për çdo politikan që paguhet me taksat e popullit!”
Me propozimet e reja të qeverisë për ndryshime në Kodin Penal, parashikohet ashpërsimi i dënimeve për shpifje. Propozimet do të diskutohen në komisionet parlamentare më 18 nëntor, dhe në kuadër të këtyre propozimeve parashikohet që dënimet për shpifje të shkojnë gjer në tre vite burg.
Të shumta kanë qenë kundërshtimet ndaj kësaj iniciative ligjore, ku natyrshëm spikat Partia Demokratike, e cila është shprehur hapur kundër. /tesheshi.com/
