Kryeministri shqiptar Edi Rama, deklaroi para minutash në një konferencë live në rrjetet sociale se operacioni antikorrupsion në drejtësi do të trondisë të gjithë sistemin aktual.
“Do ta godasim korrupsionin në drejtesi siç nuk ia rrok mendja shumëkujt brenda apo jashtë sistemit”, tha Rama duke iu përgjigjur pyetjeve të një qytetari. Ndërkaq, në një pyetje të mëparshme kreu i qeverisë shqiptare theksoi se përgjigja e të gjithë pyetjeve që vijnë për luftën antikorrupsion do të vijë nga reforma në drejtësi, e cila do të miratohet brenda muajit shtator.
Rama ndërkaq ka theksuar qartë dhe prerë se nuk do të ketë ndryshime në qeveri. “S’ka plan për ndryshime në kabinetin qeveritar. Ky kabinet është produkt i kontratës me popullin shqiptar në 23 qershor 2013”, tha Kryeministri duke iu përgjigjur në fakt një kërkese të ardhur nga aleati i tij Shpëtim Idrizi.
Kreu i partisë “çame” PDIU në një intervistë në gazetën Panorama bëri thirrje për ndryshime.
“Nëse ky ndryshim kërkon edhe ndryshime të dhimbshme emrash, fytyrash, stilesh përmbajtjeje dhe frymë ministrash nuk ka pse jo. Karrriera e asnjë ministri nuk vlen në këtë dëshpërim të shqiptarëve, prandaj unë mendoj e besoj se duhet një marrëveshje e re mes të gjithëve ne shqiptarëve”, tha Idrizi.
Ndërkaq, kryeministri Rama, pyetjes se “a po ju lejon Ilir Meta të bëjë shtet?” i është përgjigjur se nuk mund të ndërtohet shteti i shkatërruar për kaq pak kohë.
Ndërkaq, një pyetje në lidhje me bashkimin kombëtar Rama ka theksuar se “Bashkimi Kombëtar ka ndodhur i dashur mik na takon ne ta bëjme realitet të prekshem pa kufij për ekonomine dhe çdo ndërveprim shoqeror”.
Kryeministri ndërkaq, ka theksuar se mazhoranca do të votojë çdo ligj që ka kthyer Presidenti i Republikës pa ndryshuar as pikë e as presje. Ndërkaq në lidhje me eksodin drejt Gjermanisë, Rama tha duke iu përgjigjur një pyetje se pjesa më e madhe e të ikurve kanë qenë emigrantë prej kohësh në Greqi dhe mohoi se shumica e tyre është nga Shqipëria.
/tesheshi.com/
