Sulmet e Shteteve të Bashkuara të Amerikës ndaj Sirisë, në përgjigje ndaj sulmit vdekjeprurës me armë kimike ndaj civilëve më herët gjatë kësaj javë, për të cilin, e kanë fajësuar qeverinë siriane, pas shumë vendeve të botës ka marrë mbështetjen edhe nga Kosova.
Sulmi në fjalë është mirëpritur nga politikan dhe njohë të fushës së sigurisë.
Presidenti Hashim Thaçi, përmes një shkrimi në Facebook ka thënë se e mbështet fuqishëm veprimin e Donald Trump në sulmin ajror kundër regjimit vrasës të Assadit.
“E mbështes fuqishëm veprimin e Donald Trump në luftimin e regjimit vrasës të Assad-it. Assad, duhet të përballet me drejtësinë dhe populli sirian duhet të jetë i lirë” ka thënë Thaçi.
Edhe kryeparlamentari, Kadri Veseli ka vlerësuar se sulmi amerikan në Siri është mesazh se bota po ecën në rrugën e duhur.
“Sulmi i Amerikës në Siri i kujton vlerat që ka Amerika për njerëzimin”, ka deklruar Veseli derisa i ka thurur lavde edhe Donald Trump-it, duke thënë se vendimi i sotëm është tipik për një lider.
Edhe shefi i grupit parlamentar të Aleancës për Ardhmërinë e Kosovës, Pal Lekaj veprimet e fundit të SHBA-ve kundër regjimit të Assadit janë më se të nevojshme për të parandaluar gjenocidin ndaj popullit të pambrojtur Sirian dhe për t’i dhënë fund kësaj luftë shkatërrimtare.
“Pamjet e rënda që po transmetohen nga rajonet e luftës në Siri tregojnë që atje nuk janë duke u respektuar as minimalisht rregullat dhe konventat për mbrojtjen e civilëve. Vrasja e njerëzve të pambrojtur, e sidomos kur bëhet fjalë për fëmijët që janë qenia me e pafajshme, duhet të dënohet me ashpërsinë me të lartë edhe veprimet por edhe ata që po i bëjnë ato”!, ka shkruar Lekaj në Facebook.
Njohësi i sigurisë, Burim Ramadani, poashtu përmes një shkrimi në Faccebook ka mirëpritur sulmet amerikane ndaj Sirisë.
“Amerika na bën të ndihemi krenar edhe njëherë. Tash me vendimin që Presidenti Trump mori mbrëmë për t’i treguar vendit Assadit, atij kasapi që vret fëmijë me armë kimike. ISIS-i me egërsirat e veta, në anën tjetër, do të fshihet nga faqja e dheut”, shprehet Ramadani.
Ndryshe, sulmi i Amerikës ndaj Sirisë u nis në orët e hershme të mëngjesit të sotëm ku u hodhën rreth 60 raketa në drejtim të bazës ushtarake siriane. /tesheshi.com/
