Qeveria e Përkohshme e Turqisë e cila do të çojë vendin në zgjedhje ka 2 ministra të partisë së kurdëve HDP dhe një ministër të partisë nacionaliste MHP. Ministritë kyçe si ajo e jashtme, janë lënë në duart e teknokratëve pa parti, kurse ministria e Mbrojtjes do të mbahet nga një eksponent i AK Parti, që drejtohet nga Kryeministri Ahmet Davutoglu.
Kreu i qeverisë bëri të ditur listën pas betimit që u bë para Presidentit të Republikës, Recep Tayyp Erdogan.
Një nga ministrat kryesorë të qeverisë, pikërisht Ministri për Marrëdhëniet me Bashkimin Europian: Ali Haydar Konca, i përket partisë kurde (Partisë Demokrati të Popujve HDP). Po ashtu kjo forcë politike do të ketë edhe Ministrinë e Zhvillimit, në krye të së cilës do të jetë: Muslum Dogan.
Ndërkohë, Partia Nacionaliste MHP do të ketë një zv.kryeministër.
Ministër i Jashtëm është emëruar Feridun Sinirlioglu, një diplomat karrierë që deri tani ka qenë sekretar i përgjithshëm i ministrisë.
Ministër i Brendshëm është emëruar Selami Altinok, një teknokrat që ka përvojë të gjatë në drejtimin e Forcave të Rendit. Kurse Ministria e Mbrojtjes do të drejtohet nga një eksponent i partisë më të madhe AK Parti, përkatësisht nga Vecdi Gonul. Ndërkohë partia e qendrës së majtë: CHP do të vazhdojë të mbesë në opozitë.
/tesheshi.com/
