Nuk dihet nëse ka qenë me kast apo rastësisht, që mu këto ditë kur ka plasur debati mbi personalitetin e Dhimitër Shuteriqit, gjyshit të Ben Blushit, – duhet thënë dritëhijeve të këtij personaliteti – në Digitalb transmetohet një dokumentar kushtuar atij.
Dokumentari u transmetua të martën mbrama në kanalin T, që fare mirë i shkonte situatës, ku emri i të ndjerit është përfolur këto ditë në media edhe si plagjiator, përvetësues tekstesh e punimesh të të tjerëve.
Shkak u bë shpërthimi i të nipit, Ben Blushit, i cili foli me urrejtje karshi figurës së Lef Nosit, njeriut me të cilin akademik Shuteriqi nuk i ka patur punët fort mirë.
Kjo bëri që në disa media të hapen letra të cilat e kompromentojnë rëndë figurën e të ndjerit Dhimitër, që njëherësh u pozicionuan në mbrojtje të figurës së Nosit. Ndërsa shfrimet e Blushit, më shumë se për shkaqe parimore, u trajtuan si inate individuale të trashëguara në kohë.
Dhe dokumentari i transmetuar në Digitalb, i cili padyshim që i shpërfaq Shuteriqin si një akademik gjenial, ngjante si një kundrasulm ndaj “përdhosësve” të figurës së tij këto ditë. /tesheshi.com/
