Kryeministri Rama i është rikthyer Skënderbeut, profetit kombëtar siç e quajti atë në fillim të fushatës, duke e ndërlidhur me kredon e sforcuar elektorale të Shqipërisë në BE.
Nga Kuçova, ai deklaroi:
“Arsyeja se përse u them se PS i duhet mandat i katërt, është sepse bëhet fjalë për të përmbushur një mision historik, që zanafillën e ka të profecia e heroit tonë Kombëtar, Gjergj Kastrioti, që e përcaktoi fatin tonë të lidhur me Perëndimin dhe jo më Lindjen”, tha Rama.
Është kjo një deklaratë që po të qe gjallë ish-miku i tij i ngushtë Ardian Klosi, do qeshte hidhur me të. Ardian Klosi është njeriu që në vitin 2007 do përkthente monografine “Skënderbeut” të historianit zviceran Oliver Jens Schmitt. Është ndër ato vepra që zhbën Skënderbeun e sajuar mitik të historiografisë komuniste shqiptare, deri diku dhe asaj europiane si “Atlet i Krishtërimit”, duke e sjellë pa areuolën idealiste që iu është servirur shqiptarëve. Por do qeshte dhe vetë Rama, si me shumëçka të tijat që thotë sot politikisht, ai i djeshmi, i viteve ’90, i angazhuar me destruktimin e miteve shqiptare. Ky angazhim madje i atëhershëm ishte dhe ana më shkëlqimtare e tij në aspektin kulturor, të cilën sot nuk e ka më. /tesheshi.com/
