Ben Blushi i ka dhënë fund hamendësimeve se mund të kandidojë për Bashkinë e Tiranës. Deputeti socialist i ka drejtuar një apel Kryeministrit Edi Rama që të konsultohet me Grupin Parlamentar për kandidaturat që do të garojnë në zgjedhjet e 21 Qershorit.
“Nuk jam në garë për Tiranën. Mendoj se Rama duhet të konsultohet me grupin e PS për kandidatët”, tha Blushi për mediat.
I pyetur për dorëheqjen e Artan Shkëmbit nga posti i Kryetarit të Bashkisë së Pogradecit, Blushi e ka quajtur “braktisje të detyrës” aktin e bërë publik një ditë më parë nga Shkëmbi.
Ndërkohë deputeti Tom Doshi i është rikthyer akuzave dhe kritikave ndaj Qeverisë në mbledhjen e Grupit Parlamentar socialist. Doshi ka ngritur si shqetësim faktin se ministrat nuk i hapin as telefonat deputetëve, ndërsa i ka drejtuar një apel Edi Ramës që të bëjë analizën e punës së Qeverisë para zgjedhjeve vendore.
Doshi u shpreh se ministrat me performancë jo të mirë duhet të largohen, ndërsa shtoi se Kryeministri duhet të mbledhë Grupin Parlamentar dhe të analizojë punën e ekzekutivit.
Në mbledhjen e Grupit Parlamentar nuk ishte prezent Kreu i Qeverisë, ndërsa ajo është drejtuar nga Gramoz Ruci.
